Aizawl: Mizoram Board of School Education (MBSE) buatsaih, pawl 10 Science leh Mathematics zirlaibu, Mizo tawnga ziak chu nimin khan Education Minister Lalchhandama Ralte-in a tlangzarh.
Lalchhandama Ralte chuan Science leh Mathematics subject chu mi tam zawkin an subject huphurh a ni a, tunah chuan Mizo tawng ngeia zirlai bu a lo awm takah chuan zirlaite pawhin an ngam sawta an tlangnel sawt leh an tui phah a rin thu a sawi.
Bilingual textbook chu tunah Mizo version chiah chhuak thei rih mah se kum 2023-2024 atangin English leh Mizo tawngin an dah kawp vek tur thu leh tuna mi hi chu a bul tanna chauh a nih thute a sawi.
Mizoramah hian zirlai huang (syllabus)-te chu a tê bik lo a, quality education-ah a zahpuiawm lo hle tih a sawi bawkin, “Inchawimawi leh inlawmpuina kawngah Mizote kan harh a hun tawh,” a ti bawk.
MBSE chuan zirlaibute Mizo tawng ngeia dah a nih theih nana hma lain Bilingual Sub-Committee on Secondary Science & Mathematics a din a, workshop pawh an nei a, tunah subject pahnih chu Mizo version-in siam a lo ni a, academic session thar atang chuan bilingual textbook hi secondary stage-ah hman theih ngei turin hma an la mek a ni.
Lehkhabu tlangzarh inkhawmah hian Education Secretary Dr. Lalzirmawia Chhangte-in thu a sawi bakah MBSE Secretary Sarah Lalengzami Pachuau-in textbook an buatsaih dante a sawifiah a ni.