- Reuben Lalnunthara Hnamte
Tunlai kan Issue lian tak pakhat chu Zoram thar hi niin a lang. Zoram thar lo thleng tur nghakhlel takin an thlir mek a. Chutih rual erawh chuan zoram thar lo thleng turin kan thlir dan leh hmuah dan erawh a inang vek lo a ni maithei. A then chu kohhran atang chhuahphah a, kal bing deuh an awm a, thenkhat chu kohhran atanga chhuak chuang lo va awm an awm bawk. Hman deuh atang tawh khan zoram thar tih ni chiah lo, he mi hrul deuh a lo khel te kha an awm nawk thin a. Mi tamtakin an eizawnna te chhuchatin, an sorkar hna te bansanin an kalchhuak a, an pemkhawm thin a nih kha. Mite hi indem ngawt hleihtheih loh a nihna chin a awm a; an hmuhdan leh pawmdan a nih miau si chuan hanin sawisel vak a sawt loh chin pawh a awm thin.
Mi tamber rinnaah chuan Pastor Chhawna te, Pu.Saikhuma te lo sawi lawk thil hi thleng dik ngei tura ngaiin, china ral lo lian tur leh chu mi atanga Mizoram chu mahnia ro inrelna a awm tura thlir lawkna te a ni ber. Chutih rual chuan a then chuan zofate insuihkhawm a, mahnia ro inrel tura U.N.O in a pawmpui huna zoram thar chu siam tura hma la mek leh thlir an awm bawk. A enga pawh chu nise, kei chuan heng ang thlirnate hi a dik lo ka tiin ka sawisel a ni hauh lo va; hmalam hun a ni a, sawi lawk theih a har hle. Miten an lo thlir dan leh pawmdan chu engpawh lo ni se, kei chuan zoram thar lo thleng tura thil pawimawh ni a ka hriat kan sawi ve thung teh ang.
Simna tak : Zoram thar kan neihna tur pawimawh em em chu simna hi a ni. Tunlai hunah kan ramah ngei pawh sualna a pung nasa hle mai a. Hmeichhiat mipat hmansualnate apung nasa a, ruihhlo a hluar a, zu lah a tam tulh tulh emaw tih tur a ni. Ruk rukna te, inbumna chi hrang hrang a hluarin, smuggling thil chi hrang hrang nen, kan ram chu rapthlak khawpin sualna hian min run mek a ni. Eiruknate a hluar em em a, duhamnate hian kan khat zo tawh. Mahni hlawh tawka lungawi lova, pawisa siam pun tum kan pung zel a ni. Heng ang diklo taka sum lakluhna te hi kan sim ngam a ngai’chuti lo chuan zoram thar hi kan thleng thei lovang. Pathian duh loh zawng, hmeichhiat mipatna, neih in ang inkawpnate hi sim a ngai. Eirukna leh hlemhletna hluar zia kan hmu a, kan hre bawk a; han hrem lah chu an awm ngai mang lova, thubuai awrhtir tak lah chu sawi tur an awm mang lo.
Mihring thinlung inthlakthlengna tel lo leh simna tel lo chuan zoram thar pawh hi thleng ila awmzia a awm chuang lovanga, a nuam chuang dawn lo a ni. Chumi atan chuan mi mal, chhungkua atanga bultan kan ngai a nj. Chhungkaw tin hian sualna hi do ngam ang u. Thalaite pawh hian in nu leh pa te eirukna emaw, dik lo taka sum an lakluhnate an hria a nih chuan dodal ngam a hun. Thalaite atanga tan a ngai, tunlaiah thalai fel tak tak kan nei tawh. Thalai zuk leh hmuam pawh ti lo, ruihhlo laka fihlim, rilru thianghlim , zoram siamthat chaka vei tak tak kan nei tawh a, hengte hian bul an tan a ngai tawh a ni.
Ram rorelna tha : Kan ram rorelna hi eirukna nen a inzawm tlat emaw tih mai tur khawpin a chiri tawh a. Hman atangin party hrang hrangte lo lalin, ro an rel a, mipuite hian kan roreltute kan duhkhawp lohzia leh eirukna tamzia hi kan auchhuahpui chamchi mai thin a nih hi. Kohhrana inhmang tak tak te pawh kan han vawrhchhuak thin tak na in, eng a ang chuang hlei lo va. Siamthat lam ai hian min eichhe zel zawk emaw tih mai tur a ni zaw mah a. Zoram thar kan khel ta sa sa a, chu mi thleng tur chuan ram rorelna tha zawk nei tur hian tan ila ang u hmiang. Kan thalai tam takte hi an penchhuah a ngai tawh. Kan sawi tawh angin kan Thalaite zingah, mi thiam tak tak leh, mi nun mawi leh fel tak tak an lo tam ta a. Khawvel ramdangah pawh hian thalaite hian ram hruai hna hi an thawk nasa tawh a, hmeichhe fel tak tak te Prime Minister leh President leh a rorel khawl ah te an lo chawr chhuak zel a. Kan ramah pawh hian thalai angaihna hria te harh a hun khawp mai.
Ram changkang zawk America leh hmundangahte chuan Loneimi leh kut hnathawk te chu mi hausa an ni a, khi tah an hmu. Sorkar hnatawhkte chu mi pangngai an ni mai. Keini India ram angah chuan kut hnathawk leh loneimi kan tih te chu khu tah kan hmu thung. Sorkar hnathawk leh Politiciante an hausa thur thur thung a. Zoram thar nei tura ke kan pen mek lai hian keimahni lam hian simna leh inthlakthlengna kan neih si loh chuan kan zoram thar tur hi a nih tur ang a ni lo ang tih a hlauhawm hle a ni. Politics thli chhia leh thil fel lovin a eiral mai mai loh tur, danglam ngam, kan Bible a Daniala te thian zaho anga, Babulon bawlhhlawhna laka inthiar fihlim ngam, Pasaltha huaisen kan ram hian hruaitu a mamawh a ni.
Kan ram hian inthlakthleng (Change) kan mamawh a. Kut hnathawkte an lo hausak a, khi ta kan hmuh hunah leh simna tak tak nei a, sualna te tihrem a lo nih zel hunah chuan Zoramthar chu kan la hnaih ve mahna.