India leh China hi ramri-ah vawi tam an intibuai tawh a, a chhan bul ber chu an ramri chiang lo a ni.
Ramri an intawm hi a kalna kawng a khirh em avanga a ni lai a chian hleih theih loh chu thuhran ni se, LAC hrulah hian ram chin tihchian nan khawi lam ve ve pawhin in leh hmunhma tam tak an din a, hei hi an inngaihtheih lohsak tawn ve ve bawk.
Tun hnai lawkah India hian tlangram hmun sang leh vawt takah kawngpui sialin a air base panna tur atan a ti a, hei hi kum 2020-a an sipaite intihbuaina chhuahna chhan ber pawh kha a ni.
Kum 2020 kha tun hnaiah chuan ram pahnihten ram hum nana ramria tharum an thawh nasat ber leh boruak a lum ber kum a ni.
June thlaa Galwan Valley-a an intihbuai pawh kha kum 1975 hnua an inepnaa sipai thi an awm hmasak ber tum a ni a. India chuan a sipai thi zat a puan mai laiin China chuan a zat tak a sawi ve lo nghe nghe.
August thlaah pawh India chuan China hian chawlhkar khat chhungin a sipaite hmangin ramri-ah boruak lum tak a siam niin a puh a. China erawh chuan phain inepna hi India bultan zawk niin a sawi ve thung.
Hemi kum vek September thlaah pawh China chuan India-in a sipaite a kap niin a sawi a. India chuan China zawk hian sipai tum lovin van lam hawiin tihthaih nan silai an hmet puak zawk niin a sawi ve bawk.
Silai hi a puak tak tak a nih chuan kum 45 zet hnua ramria silai a puah leh hmasak ber a ni tihna a ni a. Kum 1996 khan ramri-ah hian silai leh puak thei dang engmah hmang lo turin inremna an lo siam tawh a, Galwan Valley-a an buainaah pawh kutlawnga sipaite hi an insual chhan nia ngaih a ni.
Indo tak chuan ram pahnihte hi kum 1962 chauh khan an la indo va, hemi tum hian India hi a tlawm chiang hle.
Indona tawp mah se boruak erawh a dai mai lo va, ram hnihte hian nuclear ralthuam an puah mup mup a. An insumdawn tawnna pawhin nasa takin a tuar bawk.
Ramri-a buaina hi politics pawh a nghawng a, Indian Prime Minister Narendra Modi leh Chinese President Xi Jinping inkar a tha thei lo.
Mi thiamte chuan ram hnihte hian tam tak chân an neih ve ve a ngaih dawn avangin inbiakna hmang chauhva an buaina hi chin fel chi niin an ngai hlawm.