Lalthara te Unau Foundation (LUF) chu vawiin khan Dr. Tawnenga, Principal, Mizoram Christian College-in a hawng. LUF hmingin pawl panga hnenah chawimawina thuziak leh Rs nuai 1 theuh hlan nghal an ni.
LUF hawnna inkhawm, RB McCabe Hall, Aijal Club, Aizawla neihah hian Upa Lalthara lehkhabu ziak ‘Piang Thar ni lovin Pathian Hrin’ tih chu Rev. Zosangliana Colney-in a tlangzarh bawk.
He foundation bultan nan hian an unauin Rs. nuai 105 an thawhkhawm tih LUF President Lalthara’n a sawi a. An tum ber chu Pathian thil siamte tichereu lova vawnhim kawnga a theih ang anga hmalak a nih thu leh zirna leh thildanga theihna bik nei, sum lama harsatna tawk si te a theih anga chhawmdawl pawh LUF-in a tum zing ami a nih thu a sawi.
LUF hawnna inkhawmah hian LUF Secretary Lalnunmawia Chuaungo kaihhruaiin chawimawina sem chhuah a ni a. Pathian thilsiam hrang hrang vawnhim/humhim kawnga thawktu pawl hrang hrang ;
- Biodiversity management committee, Sailam
- Centre for environment protection (CEP)
- Mizoram Zoological society
- Save Mizoram rivers
- Youth for environment justice Mizoram te hnenah chawimawina thuziak leh Rs. nuai 1 theuh hlan an ni.