Aizawl: Deputy Chief Minister Tawnluia chuan nimin khan New Delhi-ah sorkar laipuia Ministry of Housing & Urban Affairs Secretary, Manoj Joshi a hmu a, UD&PA Department hmalakna hrang hrang leh hmachhawpte a sawipui.
Tawnluia hian union secretary hnenah hian Swachh Bharat Mission hnuaia urban town-ten uluk zawka bawlhhlawh an sawngbawlna tur, Solid Waste Management Centre chungchang sawipuiin a hlawhtlin thuai theih nan hma lak ran a tul thu a hrilh a, Special Assistance to States For Capital Expenditure Part 6 Urban Reforms hnuaia project pawimawh tak tak pathum atana UD&PA-in proposal an thehluh pawh bawhzui turin a ngen.
Dy. CM hian ADB loan hmuh tur, Aizawl Sustainable Urban Transport Project pawh chak taka hmalak a nih thu secretary hi a hrilh a, project kalpui a nih hunah pawh ministry puihna tam tak an mamawh tur thu a hrilh a ni.
Joshi hian Dy CM hnenah hian AMRUT, SBM(U), PMAY(HFA) leh scheme dangah state chanpual tur allocation awm sa chu tihkhawtlai awm lova release zel a nih tur thu a lo hrilh a, Dy. CM thu thlente chu a lo bawhzui ngei tur thu a sawi bawk.
Tawnluia hi Amjad Tak, Resident Commissioner; Lalmalsawma Pachuau, Secretary UD&PA leh Zoramsiama Hmar, Under Secretary UD&PA ten an tawiawm.