Barcelona in Spain-ah league hmahruaitu ni turin hun remchang an neih chu an bawhpelh lova. Inkhel pawimawh takah 1-0 in Atletico Madrid an hneh.
Pathianni zana Wanda Metropolitano a inkhelah French winger Ousmane Dembele chuan inkhel a goal awmchhun first half minute 22-naah a khung a. Second half-ah goal ban pet perin goal a khung belh teuh.
Atletico Madrid pawhin goal an khung teuh a, mahse Antoine Griezmann-a goal khung tur chu Ronald Araujo chuan goal line atang a pet chhuak hman.
Inkhel boruak a sang a, huntawp dawnah Stefan Savic leh Ferran Torres te an intihbuai avangin hnawhchhuah an ni ve ve.
Barcelona coach Xavi Hernandez chuan, “Point thum kan hmu a ni satliah lova, kan rilru a phurna lian tak siamtu a ni dawn. Kan team ka chhuang hle a, league champion thei kan ni tih nemnghehna a ni.” tiin an chak hnuah a sawi.
“A tir darkar chanve chhung kan kheltha hle a, chak turin dinhmun kan siam a, point thum a hlut phah. A chhan chu goal venghim turin kan inpek a ngai hle a, inkhel hautak paltlang dan kan thiam tawh hle.” a ti bawk.