Manchester City in club lian pahnih inkhela ngaihah awlsam takin hnehna an chang a. Mahni mualah harsatna nei lovin FA Cup fourth round an lut.
Etihad Stadium-ah tum danga club pahnihte inkhel ang ni lo tak a thleng a. Chelsea in beisei pha lo hle in Premier League champion lai in awlsam takin an dahtha. Round dawtlehah Oxford United leh Arsenal inkhel a chak zawk an hmuak.
A awlsam e
Ningani zanah club pahnihte an inkhel tawh a, hemi tum hian City in hnehna hautak takin an sualchhuak. Pathianni zanah erawh engkim a danglam a, first half-ah Chelsea an nghaisa.
Minute 23-naah Riyad Mahrez chuan freekick mawi tak khungin bul a tan a. Argentine forward Julian Alvarez-a’n penalty atangin minute 30-naah an goal hnihna a khung leh a, he penalty hi Kai Havertz handball vanga Chelsea chawi a ni.
Phil Foden chuan minute 38-naah an goal thumna a khung a, Kyle Walker-a ball cross chu goal-ah thai lutin Mahrez-a finzia City in an chhawr hle.
Algerian winger in an goal hnuhnung ber chu huntawp dawnah a khung leh a, Kalidou Koulibaly chuan tul lo takin Phil Foden ti tlu in penalty a chawi a, Mahrez-a’n an goal li na a khung.
Mikhual team an baihvai hle a, manager Graham Potter hnuaiah la inkhel rei lo mahse hmasawn lam an pan thei lo. Club neitu thar Todd Boehly-a’n September a a ban tak manager hlu Thomas Tuchel-a hming fans lamin inkhelh laiin an auchhuahpui nasa hle.
Potter-a hun a hmawr?
Stamford Bridge a an inkhelh tumin Chelsea an vanduai a, an fans te pawhin an hrethiam. Inkhel zawhah champion lai laka beiseiawm taka an inlan theih avangin an team an lawm. Tun tumah erawh boruak a dang viau.
Halftime-ah an fans ten an ‘boo’ hluah hluah a, second half-ah hma an sawn loh avangin a tawp thlenga inkhel ente an lawm lo hle.
Player inhliam an neihte avangin an harsatna belhchhah a ni a, nimahsela Potter-a’n Mateo Kovacic, Koulibaly, Havertz, Mason Mount, Jorginho, Hakim Ziyech leh goalkeeper Kepa Arrizabalaga te a chhawr a, player tha rual remkhawmna inkhel ang erawhin football an khel lo.
Ball an chanin tihsual an ngah a, passing awmze nei a kalpui an ngah lo. Ball tel lovin an tha a za tawk lo bawk.
Man City hian Chelsea hi tualchhung cup inelna pahnih atangin an hneh ve ve tawh a. Tun dinhmunah Blues hian point 10 in Champions League khelh phakna hmun an hlat mek bawk. UCL round of 16-ah Borussia Dortmund an la khel leh ang.
FA Cup fourth round hi January 27 atanga 30 inkarah khelh a ni ang.