President hlui, Jair Bolsonaro-a thlawptuten an ram Congress leh sorkar hmun pawimawhte an luhchilh dem nan leh mipui rorelna chhan nan Brazilian mipui sang telin kawngzawh liantham tak an huaihawt ve.
An khawpui lian ber, São Paulo-ah chuan mipuiten Bolsonaro chu lung in tang ngei tura an duh thu an aupui.
Pathiannia an khawpui, Brasilia-a president hlui tantute chetnaah hian mi 1,500 chuang man an ni tawh.
Brazil-ah hian October thlaa inthlanah khan Luiz Inácio Lula da Silva chu president atana thlan tlin niin Bolsonaro leh amah thlawptute chuan an chak lohna an pawm lo hle a. President thar lak luh atanga chawlhkar khatah na takin an che chhuak ta a ni.
Thawhtanni tlai khan kum 77 mi, an hruaitu thar, Lula tia an sawi mai hian Congress building, presidential palace leh Supreme Court chhunga thil chhiate chu governor-te nen enin an tlawh a, ‘firfiak taka chetna’ chu demin a titute pawh hrem ngei an nih tur thu a sawi.
Kum 67 mi, Bolsonaro hian inbei tawk taka inthlana a chak loh hi a pawm lo va, January 1-a mi thar lak luh a nih hma lawk hian US-ah a kalsan a. Thawhtanni khan a pum lam that loh vangin Florida damdawi ina a luh thu puan zui a ni.
Thawhtanni khan khawpui bakah khaw tenau deuh tam takah kawngzawh huaihawt a ni.
São Paulo khawpuiah chuan Brazil-a kawtthler lar ber, Paulista Avenue chu mipuiin an awh khat vek a; an zai a, an lâm a, dikna hlen chhuah duhna an aupui bawk.
Mi tam tak chu Lula kaihhruai, Workers’ Party rawng, a senin an inthuam a, thenkhat thuziak (placard) kenah chuan ‘buaina siamtute tan himna a awm lo’ tih te a inziak a, buaina siamtute chu hrem ngei an phut a, Bolsonaro-a chu lung in tantir an phut bawk.
Police tam tak an awm a, boruak pawh a sang hle a. Brasilia-a thil thleng chuan mi tam tak a tithinur tih an chet danah a lang.
Pathianniah khan Brazil football kawr leh kawr eng dang ha sang rual chuan Brasilia-a a ram rorelna hmun pawimawhte hi an luhchilh a. Police pawh an palzam vek a, Lula tan pawh emergency puan ngei ngaiin an che.
Thawhtanni tukah ralthuam nena inthuam officer thahnem tak, inthlan lai vela inbeihna a nasat em avang khawpui hrang hrang hnaiha army barrack an daha miten Bolsonaro thlawptute hi hmachhawn tan a ni.
Brazilian chanchinbu, O Globo-in video a tihchhuahah chuan officer thenkhat chu Congress hmunpuiah hian a luhchilhtute kiangah hlim taka an awm ve lai leh thla an la kual mai mai laite a lang.
Bolsonaro tantute hian Brazil-a khawpui tam takah inkulhna hmun (camp) a siam a, thenkhat chu army barrack bul maiah te a ni hlawm a. Hetianga sipai an hnaih chhan hi sipaite chu inrawlh tura an duh vang leh inthlanna fel fai tak buatsaih an duh vang a ni.
Mi thenkhat chu Bolsonaro tlak vang chauhva thinrim an ni lo va, Lula chu lung inah tang leh se an duh tel.
Lula hi kum 2017 khan ei ruk thubuaiah thiam loh changin thla 18 lai lưng inah khung a ni a. Kum kaw chuang tang tủa hrem ni zawk mah se a hnuah thiam loh chantirna chu sut leh a ni.