Sorkar laipui ruahman angin National Food Security Act, 2013, Section 3 hnuaia beneficiary-te tan a thlawna buhfai sem tan tawh tur a ni.
Thawhtanni khan Mizoram sorkara Food, Civil Supplies & Consumer Affairs Director Dr. Andrew Vanlalauva’n district hrang hranga DCSO-te hnenah a thlawna NFSA ration buhfai sem chungchang chu hriattirin, sorkar laipuia Ministry of Consumer Affairs, Food & Public Distribution-in December 30, 2022-a notification a tihchhuah angin National Food Security Act 2013 Section 3 hnuaia beneficiary (AAY leh PHH)-te tan ration buhfai a thlawna sem tawh tur a ni a, AAY chhungkaw tan card khatah kg 35 zel, PHH beneficiary-te tan member pakhatah kg 5 zel a, sem tur a ni tih a hriatir.
Supply director chuan DCSO tinte chu an huam chhunga fair price shop tinah NFSA ration chu a thlawna sem tawh tur a nih thu hriattirin, man neia an lo sem lohna turin a concern VC/LC-te hriattira thawhpuiin, centre in-charge-te pawhin uluk taka vil turin a ti a. Ration chu online-a sem chhunzawm tur niin, e-PoS leh Digital Weighing Scale an hmang ngei tur a ni a, central sorkar duh dan angin ration late hnenah e-PoS print, receipt an pe chhuak ngei tur a ni, a ti bawk.