Aizawl: BJP Mizoram chuan nimin khan kum thar inhlanna leh kum thar atana an pisa ‘Mipui Run’ hawnna an buatsaih a, an president, Vanlalhmuaka chuan Mizoramin BJP sorkarna a mamawh niin a sawi.
Vanlalhmuaka hian Narendra Modi kaihhruai BJP sorkar a pian hnuah India ramin retheihna lak atangin zalenna a hmu chauh a. Mizoramah erawh sorkar laiten mi rethei chanai an tihchingpen thin avangin retheihna lak atanga kaihchhuaha zalenna hi a hmu ve thei lo nia sawiin, “Retheihna lak atanga zalenna kan neihna turin BJP sorkarna hi Mizoram hian kan mamawh a. Retheihna lak atanga khaichhuah hi BJP din chhan leh a tum a ni,” a ti.
Kumina MLA general election lo awm turah Mizoram chu retheihna sal atanga a chhuah theihna tur leh mamawhtute tan a taka mipui sorkar a awmna tur te, eirukna hnung khirh a, Mizoramin hmasawnna a hmuh tur ang ngei a hmuh theih nan leh mahni kea dinga intodelh a, sorkar siam turin theihtawp chhuaha hma lak a tul niin BJP president hian a sawi.
BJP hi Mizoramah thuneihna chang sorkar a siam a nih chuan India rama zirna tha a hmuh ang te, chhim leh hmar lamah Indian medical college, quality education Indian standard din turin hma an lak tur thu te, lo neitute thlai thar hralhna tur ngaih pawimawh a nih tur thu leh central scheme hrang hrangte a hman dan tur dik taka hman a nih tur thu a sawi bawk.