Aizawl: Assam Rifles 23 Sector chuan Deputy Inspector General (DIG) thar, Brig. Girish Upadhya an nei a, DIG kalchhuak, Brig. Digvijay Singh hnen atangin mawhphurhna a la tan.
DIG thar leh DIG kalchhuakte hian nimin khan Sector Hqrs-ah thuthar thehdarhtute an kâwm a. DIG thar, Brig. Upadhya chuan Mizoram tan theihtawp chhuahin hma an la dawn tih sawiin an hmalakna leh hnathawhnaah Mizoram mipui nen tha taka an thawhho a beisei thu a sawi.
DIG kalchhuak, Brig. Singh chuan Mizorama a awm chhungin mipui nen thawhhona tha tak an neih avangin a lawm thu leh hun kal zel turah pawh AR leh Mizoram mipuiin thawhhona tha tak an neih zel a beisei thu a sawi.
Brig. Singh chuan Mizoramah ruihhlo a hluar thu leh AR-ten ruihhlo dona leh man chhuahnaah theihtawp an chhuah thu a sawi a; ruihhlo do kawnga thawhpuiah Mizoram mipui a sáwm.
Brig. Singh hian nimin khan Mizoram a chhuahsan nghal a ni.