World Health Organization (WHO) chuan India-a Noida-a awm, Marion Biotech company siam chhuah khuh damdawi pahnih chu Uzbekistan-ah naupang pe rih lo turin a ti.
Nilainia he damdawi chungchanga invenna tur a tihchhuahah WHO chuan ‘a nih dan tur ang ni phak lo’ a ti a. “He thil siam chhuah hian a that dan tur ang a ni phak lo va, a nih dan tur a ni lo,” an ti.
“He WHO Medical Product Alert hian Uzbekistan-a hman, a nih dan tur ang ni phak lo nia hmuh chhuah, WHO hnena December 22, 2022-a an thlen chu a kawk a. Nih dan tur ni phak lo damdawite hi a that dan tur anga sawi ni phak lote an ni,” tiin an website-ah an tar lang.
“Damdawi pahnihte hi AMBRONOL syrup leh DOK-1 Max syrup an ni a. A siamtu hi MARION BIOTECH PVT. LTD, (Uttar Pradesh, India) a ni a. A siamtute hian WHO hnenah hian an siam dan leh an thil siam that leh him tawk dan engmah an thlen thei lo a ni,” an ti bawk.
Noida-a damdawi siamtu, Marion Biotech hi tun hnaia Uzbekistan-a an damdawi thawn luhte naupangin an thihpui nia sawi a awm atangin an hming lansarh dan a tha lo hle.
WHO chuan Uzbekistan-a health ministry hnuaia mi, national quality control laboratory-in damdawi sample an endiknaah diethylene glycol leh ethylene glycol tam tham tak, a nih dan tur aia tam a tel tih an hmu tih an sawi.
“Damdawi chi hnihte hi heng lai bawra ram dangah pawh thawn luh a ni a, sem darh a ni bawk,” tiin WHO chuan a tar lang.
UN hnuaia hriselna lam viltu pawl hian damdawite hi hman atan a him lo va, a bikin naupangah phei chuan natna na tak leh thihna hial a thlen thei tih an sawi.
December 22 khan Uzbekistan hian Marion Biotech company-in an siam damdawi an ei hnuah naupang 18 zet an thi tih an sawi a. Thawhlehni khan Uttar Pradesh Food Safety & Drug Administration department pawhin company license hi a tihtawpsak.
“Marion Biotech company hian lehkha pawimawhte phawrh tur an neih loh avang leh state licensing authority-in insawi fiah tura a tihna an chhan theih loh avangin thil siam chhuah phalna chu tihtawpsak an ni,” tiin Gautam Buddh Nagar Drug inspector Vaibhav Babbar chuan a sawi.
Sample an endikna result erawh tihchhuah rih a la ni lo tih a sawi bawk.
Thla hmasa khan Union Health Minister Mansukh Mandaviya chuan Noida-a damdawi siamtu company chu an khuh damdawi siam, Dok1 Max-ah a tel tur chin bak thil telh a nih avangin an siam phalna tihtawpsak an nih thu a puang tawh bawk.