Afghan foreign ministry, Kabul bula thihchilh bomb tihpuahah mi tam tak an thi.
Police chuan civil mi panga velan thi niin an puang a; mahse, ,Taliban thuneitu sang pakhat chuan mi 20 vel lai niin a sawi thung.
Bomb hi an ram sanaa Nilaini tlai dar 4:00 (India-a tlai dar 5:00) vela tihpuah niin a tipuaktu hi ministry building chhunga luh a tum zawk a, a theih loh hnuah a kawtah a tipuakta niin Taliban chuan an sawi.
Helai hmunah hian ram dang eng emaw zatin embassy an nei a, an zingah hian Turkey leh China pawh an tel.
An ram chhunga Islamic State firfiak pawl peng pakhat, Islamic State – Khorasan Province (Isis-K) an tih chuan he beihna hi an thlen niin an insawi a, Telegram-ah an tar lang.
Sawi dan thenkhatah chuan bomb tihpuah lai vel hian Chinese aiawh leh Afghan thuneitu sangte chu foreign ministry building chhungah hian an inbe mek a ni.
Kabul-a Italian humanitarian agency, Emergency NGO chuan hliam tuar mi 40 chuanga an dawn tawh thu leh thi hi an pun theih thu an sawi.
Kabul police chuan beihna thleng hi dawihzep taka chetna a nih thu an sawi a, hetiang thlentute hi chhui chhuah vek an nih tur thu an sawi bawk.
Afghanistan hi nikuma Taliban-in an thunun leh hnuah khan beihna chi hrang hrang a tawng hnem leh hle tawh a, a tam zawk hi Isis-K chuan an tihah an chhal.
Beihna thleng hrang hrangah hian Taliban chuan thi leh hliam tuar zat hi an sawi tlem thin nia sawi a ni bawk.