Sorkarin Aizawl khawpui leh district khawpui chhungahte eirawngbawlna gas home delivery kalpui vek tura thupek a tihchhuah chu tihhlawhtlin mek a ni a, Aizawl bikah chuan veng 30 velah home delivery mumal taka kalpui a ni tawh.
The Zozam Times zawhna chhangin Food, Civil Supplies & Consumer Affairs Department Director Dr Andrew H Vanlaldika chuan December 1, 2022 atanga AMC huam chhungah leh district khawpui zawng zawngah gas home delivery kalpui vek tura thupek a tihchhuah chu tihlawhtling turin hma an la zel a, AMC huam chhung bikah veng 30 bawr velah gas home delivery hi kalpui a ni tawh tih a sawi.
Supply director chuan district khawpui hrang hrangah pawh home delivery hi kalpui zel a ni tih a sawi a, “Hetihlai hian system thara han kal hlawk chu buaithlakna laite a neih avangin veng zawng zawngah la kalpui theih vek a nih rih lo,” a ti.
Sorkar thupek tihlawhtling tura hmalaknaah hian LPG distributor, local council leh YMA-te nen an thawkho tha a, rah tha a chhuah zel a beisei tih a sawi a ni.
Dr Andrew H Vanlaldika chuan eirawngbawlna gas lei dan chi hnih a awm a, godown atanga lei leh gas home delivery a nih thu a sawi a, chu chu mipuiin an hriat a tul thu leh online hmanga gas booking chu mipuiin an uar a tul thu a sawi, “Mizorama kan lo kalpui reng tawh, point delivery hi zawi zawia tihtawp zel kan tum,” a ti.
Gas home delivery an kalpui mek chungchangah hian department kaihhruaiin distributor-te leh hemi kaihhnawih dangte nen an hmalak tawhna thlirhona an neih thin thu a sawi a, chungah chuan distributor-te pawh hma la chak tur leh gas booking awmte chu pe zung zung tura an nawr thin thu a sawi bawk a ni.