Peking University-in a zir chianna atangin China-ah chuan mi maktaduai 900 zetin January 11 thleng khan coronavirus an kai tawh niin an tar lang.
He report atanga a lan dan chuan a ram mipui 64% zetin hripuiin hi an kai tawh a ni.
An chhut dan chuan Gansu province chu a nasa ber niin mi cheng 91% zetin an kai tawh a. Yunnan (84%) leh Qinghai (80%) province-ten an dawt.
Chinese epidemiologist lawk chuan an kum thar, lunar new year an lawm hunah hian thingtlang lamah nasa takin a darh dawn niin a la sawi lawk.
Chinese Centre for Disease Control-a an hotupa ber ni thin, Zeng Guang chuan an rama Covid thawh kal mek hian thla hnih thum vel a awh dawn niin a sawi.
January 23-a kum thar an lawm tur hi hripui a len hnuah khuahkhirhna awm lova an lawm vawi khatna tur a ni dawn a. An tih dan thin angin Chinese maktaduai tel chuan anmahni khuaah an haw leh dawn.
China hian zero-Covid policy a kalpui a hlih hnuah ni tina hri lenga an dinhmun thar a tihchhuah thin chu a titawp tawh.
Hetih lai hian khawpui lian, damdawi in leh hmanrua pawh a thatna hmunah damdawi in lut a tam hle a, indaih lohna pawh a nasa.
Tun thla tirah khan Zeng-a hian ‘thingtlang lam thlir a hun’ tiin an rama hri darh chak dan thlirin a sawi a. Kum upa, damlo leh rualbanlo tam tak chu thingtlang lamah Covid laka an himna tur leh enkawlna tha dawng lova kalsan an nih thu a sawi.
China-ah hian a ram lailia Henan province chiah an dinhmun puang thin an awm tawh a. Tun thla tirah khan damdawi thawktute chuan mi cheng zinga 90% vel zetin Covid an kai tawh thu leh khawpui leh thingtlangah a darh dan a inang reng niin an sawi.
Hetih lai hian sorkar hotute chuan province leh khawpui tam tak chuan a vanglai an pel tawh hlawm niin an sawi.
China-a Lunar New Year chawlh hi January 21 atanga intan a ni a, khawvela hun khata awmhmun a sawn a tam ber tum a ni hial.
Mi tluklehdingawn hnih vel zet zin chhuak tura ngaih a ni a, mi maktaduai 10 vel lai chu tuna zin tawh nia ngaih an ni bawk.
Thla hmasa khan China hian zero-Covid policy a kalpuite chu a hlip a, Pathianni atang hian a ramri a hawng dawn bawk.
Sorkarin a puan dan chuan thla hmasa chhung khan ni khatah thi mi panga vel chauh awm zel ang a ni a; mahse, social media-a invuina hmuna intlar thui tak tak leh mitthi sawi lan thinte atanga thlirin a rinhlelhawm hle.
December thla khan Chinese thuneitute chuan Covid-a an dinhmun chu ni tin puang lovin thla bia an puan tawh zawk thin tur thu an sawi.
World Health Organisation (WHO) chuan Thawhlehni atanga hri leng thihpui zat puang duh tawh lo China hian thi zat hi a sawi tlem thin niin a puh.
Hemi hi chhangin Foreign Ministry thupuangtu, Wang Wenbin chuan Ningani apiangin thuthar lakhawmtute kawmin Beijing chuan ‘danin a phut angin a hunah, zep awm lovin, langtlang takin’ an dinhmun puan a ni ziah tih a sawi ve thung.
Khawvel huap hriselna lama mi thiamte chuan kuminah ringawt pawh China-ah hian Covid kaihhnawihah mi maktaduai thi an awm tawh a ring a. Beijing erawh chuan hripui a len atang khan mi 5,000 chuang awrh chauh thihpui an la awm angin a chhinchhiah a, hri kai thihpui tlemna ber ram zinga mi a ni.