Aizawl : PC party President Vanlalruata’n ram leh mipui dinchhuahna atan PC party policy tihhlawhtlin a ngai niin a sawi.
Kumina PC party OB thutkhawm hmasaberah PC President Vanlalruata chuan he thu hi a sawi a. “Kan rama political party dang ten kan ram leh mipui dinchhuahna tur policy neia insawi ṭhinin han sorkar bawk ṭhin mahse, a tak taka tihhlawhtlin an neih ṭhin loh avangin kan ram dinhmun chu ti hi a la ni chauh” a ti a. “PC party chuan kan ram dinchhuahna tur leh mipui nâwlpui dinchhuahna tur policy kan neih hi a tak taka tihlawhtling turin ke kan pen ngei dawn a ni,” a ti.
PC President chuan ral lam pan anga sawi ṭhin PC party chu tho chhuak mêk leh chak taka hmasawn tur a nih thu sawiin, “Kan party office building sak ṭhat hna kan ṭan nghal dawn” a ti a. An party office sakṭhat hna an ṭan theih chhan chu an party mite phur tharna vang nia sawiin, kumin kumtawp lama MLA inthlan lo awm tur chu phurna thar nen office building thar aṭangin an hmachhawn dawn niin a sawi.
Vanlalruata chuan hlawhtlinna chang tura thawkrim tura party hruaitute chahin, “Kan hruaitu leh member ten kan ram dinchhuahna tura policy awmchhun a ni tih hria a an lo vawn ṭang ṭang policy hi kan tihlawhtling ngei dawn a ni,” a ti bawk.
PC party OB thukhawm chuan an party office an sakthat dawn avangin an office hlui thlahna hun chu tun thla chhunga neih turin an rel a. Office hlui thlahna hun an hman zawhah bungruate senghawi zuiin, building sakṭhat hna ṭan nghal turin an rel bawk a ni.