Aizawl : MNF thalai President Dr. L Thangmawia’n Lunglei khawpui enkawltu tur Municipal council inthlan lo awm turah MNF mipuite tanrual a tul tur thu a sawi a. “Lunglei mipuite pawhin Municipal Council dinsaktu MNF sorkar hnenah lawmthu sawina an lantir ngei ka beisei”, a ti.
Zirtawpni khan MNF thalai hruaitute chuan Lunglei tlawhin, MNF Sub-Hqrs., office an tlawhnaah he thu hi MNF thalai President, MLA ni bawk Dr L Thangmawia chuan a sawi a. Chief Minister Zoramthanga kaihhruai sorkarin Lunglei mipui tan hmasawnna hna tam tak a thawk nia sawiin, kumin chhunga chhungkaw nuai 1 tuamchhuak thei tura SEDP pawh kalpui mek a nih thu a sawi bawk.
MNF thalai hruaitute hian zirtawpni vek khan Lunglei Municipal Council office pawh tlawh nghalin, CEO H. Lalhmingthanga’n Lunglei Municipal Council hmalaknate a lo hrilhfiah a. MNF thalai President Dr. L Thangmawia’n MNF sorkarin Lunglei mipuite a ngaihsak avangin sum harsatna karah pawh Municipal Council inrelbawlna turin kum 2021-2023 chhungin Rs. nuai 160 chuang budget atangin a ruahmansak tawh niin a sawi.
MNF thalai thuchhuahin a tarlan danin Lunglei Municipal Council inthlan hmasaber chu kumin March thla chhunga neih turin Mizoram sorkarin hma a la a. Lunglei Municipal Council-ah hian Ward 11 awmin, Village council 24 a huam dawn a, voters 40,541 an awm dawn niin MNF thalai thuchhuah chuan a tarlang bawk.