Manchester City striker Erling Haaland chuan tun season-ah goal 31 a khung tling tawh a. A club tana a hattrick vawi li na siamin Wolverhampton Wanderers lakah 3-0 in champion lai a chakpui.
Etihad Stadium a inkhelh dawnin Haaland-a kovah mipui mit a fu a. Norwegian striker hian match thum goal a khung tawh loh avangin sawi a hlawh a. Goal a khung theih em avangin a goal khung loh hlek avangin a che chhia nia ngai an awm.
Wolves lakah hetianga sawitute a chhanglet chiang hle. Minute 40-naah Kevin de Bruyne ball cross a tauh lut a, goal khatna a khung.
Halftime zawhah a hna ngai a chhunzawm a, Wolves captain Ruben Neves penalty chawi chu goal-ah a khung lehnghal a. Minute 54-naah Wolves goalkeeper Jose Sa chetsual zar a zova. Portuguese goalkeeper in Riyad Mahrez ball a pass ringawt a, Algerian forward in Haaland-a hnenah ball pe in ani in ke chhep sual hauh lovin goal-ah a khung.
Manchester City boss Pep Guardiola chuan Haaland-a chungchang sawiin thenkhatin aman goal khung mahse an team an hlauhawm lo sawt nia an sawi chu a chhanglet.
“A theihna sang tak kan hria. False 9 angin kan khelhtir thei lova, hei vang hian kan insiamrem deuh a ngai. Chawm hneh a ngai a, player tha rual in an hual avangin vawiin ang khan a khel fo ang.” tiin a sawi.