Spain a hmahruaitu Barcelona in an hmahruaina chhunzawm zel turin hnehna an chang a. 1-0 in Getafe lakah an chak.
Pathianni zana Spotify Camp Nou a inkhelah Barca hian first half-ah midfielder Pedri hmangin goal an khung a. Hnehna chan nan a tawk.
Coach Xavi Hernandez chuan Copa del Rey quarter-final a Real Sociedad an hmachhawn tur thlirlawkin player paiwmawh thenkhat Robert Lewandowski, Ronald Araujo leh Frenkie de Jong te a awltir a. Inkhelah ball thunun hneh hle mahse goal hlauhawm erawh nan siam tam lo.
Pathianni inkhel dangah champion lai Real Madrid pawhin an hmelma an um zel a. San Mamés Stadium-ah 2-0 in Bilbao an hneh.
Los Blancos tan striker Karim Benzema chuan minute 24-naah mawi taka volley lutin goal hmahruai a khung a. Second half tawp dawnah Toni Kroos chuan an goal hnihna a khung.
Real hian Ningani zanah Atletico Madrid an tum leh dawn.