Australian Open-ah record chelhtu ni mek Novak Djokovic chuan a record siamlai pawtsei a a vawi 10-na atan champion tumin ke a pen chhunzawm a, tualchhung player tha Alex de Minaur awlsam takin a hneh.
Kum 35 mi Djokovic hi tournament tan tir atangin malpui veilam hliam tenau nei chungin a inkhel a, mahse harsatna neih phah lovin 6-2 6-1 6-2 in a chak a, quarter-final ah Andrey Rublev nen an inkhel leh ang.
Djokovic hi third round a Grigor Dimitrov nen an inkhelh tumin a hliam hi enkawl in medical time out a lak a ngai a. Round hmasa lamah pawh endik a lo ngai tawh.
Nimahsela De Minaur lakah chet vel a harsat phah lova. Darkar hnih leh minute ruk chhungin hnehna a chang.
“Kumina ka khelh that ber tum a la ni ang, khami tur khan ka theihna zawng zawng ka sawrbing. Tun tum inkhelah hliam ka nei tih a hriat mang loh. Ka chet vel zawng pawhin harsatna ka nei lova, ka tan thil tha tak a ni.” tiin Djokovic chuan a sawi.
De Minaur hi kumin Australian Open a tualchhung mi tla hnuhnung ber a ni a. Djokovic-a’n kawh leh dik tak taka ball vaw chunga inkhel a thunun thin chu chhanletna a nei lo.
Rublev erawh seeded number 4 hauhtu tan hian fiahna hautak zawk ni tura ngaih a ni a. Australia a che tha thin ve tho a nih bawk avangin Nilaini a inkhel hmuhnawm tak a nih mipuiin an beisei.
Djokovic hmachhawn chungchang chu Russian player chuan fiamthu a sawiin, “Tuman Novak hmachhawn hi kan duh lo. Kei phei chu draw an neih lai khan a awm lohna lama awm hi ka duh a ni.” a ti.
Kum 25 mi Rublev hian quarter-final lut turin Danish rawlthar Holger Rune chu 6-3 3-6 6-3 4-6 7-6 (11-9) in a hneh a. Set hnuhnung berah 5-0 in hniam hman mahse a tawpa a beihletna a ropui hle.
Hetihlai hian kumin Australian Open-ah hmelthar che tha Ben Shelton pawhin hnehna a la chang zel a. American mi Shelton hian a hnampui JJ Wolf chu set nga inkhelah 6-7 (5-7) 6-2 6-7 (4-7) 7-6 (7-4) 6-2 in a hneh.
Kum 20 mi Ben Shelton hi world number 55 ni thin Bryan Shelton fapa hian Grand Slam inelna a hmachhawn tum hnihna chauh a ni a. Nikum khan ATP rankings-ah 569-na niin tun tumah hian no. 89 a ni mek.
Quarter-final ah hian a hnampui dang Tommy Paul a hmachhawn leh dawn a. Ani hian seeded number 24 Roberto Bautista Agut 6-2 4-6 6-2 7-5 a hneh ve thung.