California police-te chuan Los Angeles khawpui bula ballroom dance studio-a mi 10 lai kap hlumtua an puh chu van var chhungah thiin an hmu a, kum 72 mi, Huu Can Tran-a a ni.
LA County Sheriff Robert Luna chuan amah inkap hlum a nih thu a sawi.
Tran-a’n mi a beihna, Monterey Park khawpui hi Asian thisen kai an tamna niin Lunar New Year an lawm hun laia thleng a ni.
Police hian hetianga Tran-a’n mi a beih chiam chhan hi an sawi lo.
Silai a hmeh puahnaah hian mi 10 dangin hliam an tuar bawk a, an zinga pasarih chu damdawi inah an la awm a, thenkhat chu an na hle nghe nghe tih Pathianni chawhnua Monterey Park-a thuthar lakhawmtute a kawmnaah sheriff chuan a sawi.
Thite chu tute nge an nih an chhui zui mek thu leh kum 50, 60 vel bawr an ni hlawm a, heng aia upa pawh an ni thei tih a sawi.
A hmain thuneituten hmeichhia leh mipa panga ve ve an thih thu an lo sawi tawh a, an vai hian Asian thisen kai nia rin an ni.
California chanchina inpawngkahna rapthlak ber pawl hi an ram sanaa Inrinni zan dar 10:22 (India-a Pathianni chawhma dar 11:40)-a Los Angeles laili atanga khawchhak lam km 13 vela hla, Monterey Park-a hmun lar tak, Star Ballroom Dance Studio-a thleng a ni.
Silai hmet puaktu hi a tlan sawn zui nghal a. A hnu darkar chanve velah a bul lawk, Alhambra khuaa dance studio bawk a luhchilh zui lehnghal.
Studio-ah hian mi pahnihin lo bei letin a ralthuam ken, semi-automatic pistol leh a magazine an lo chhuhsak a, amah erawh a tlan chhuak.
Sheriff Luna chuan a ralthuam ken hi California-ah chuan hman khap nia an hriat thu leh an chhui zui tur thu a sawi.
Alhambra khuaa lo bei lettute chu fakin ‘hero’ an nih thu a sawi a, “Nunna an chhanhim a, chhiatna nasa zawk thleng thei an dang a ni,” a ti a.
Lo dang lo sela chuan Tran-a khan mi dang pawh a thah ngei a rinawm tih a sawi.
Pathianni khan darkar eng emaw zat chhung chu thuneitute silai hmet puaktu hi zawngin Los Angeles leh a chhehvel a dap a ni.
Monterey Park-a a chet atanga darkar 12 dawn hnu, chhun dar 1:00 (India-a Thawhtanni zing dar 2:30) hma deuhvin SWAT team-in Torrance-a lirthei hunna hmunah van var an nangching ta a, hei hi a chet tanna atanga km 48 vela hla a ni.
Van chhungah chuan silai vawi khat a puak a, an en chian chuan Tran-a chu a khalhna fawng kual bawhin a lo thi tawh a.
A bulah handgun a lo awm a, mi kaptu ngei a ni tih an finfiah zui ta tih Sheriff Luna chuan a sawi.
Sheriff chuan amah chauhva che niin a sawi a, rinhlelh dang an awm lo tih a sawi.
Monterey Park-a cheng zinga 65% vel hi Asian American an ni a, America-a Asian khawpui hmasa ber tia sawi thin a ni a. US-a khawpui zingah Asian thisen kai an chen tam zawkna khawpui hmasa ber a ni.
Inpawngkahna thlenna hmun hi an hmun lar leh pantu ngah tak a ni a, a bikin Inrinni zanah an buk zual thin.
Lâm zirtirtu pakhat, Alex Satrain-a phei chuan a hmun pan thang deuhte phei chu ‘chhungkua’ anga an inen mai thu Washington Post chanchinbu hnenah a sawi.
Thite sun nan Lunar New Year an lawmna tura an i ruahman sa pawh an thulh vek a. Sumdawngte pawhin laltin sen an khai la thlain kawtthlera kût lawmna lam hawi banner tarte pawh lak thlak vek a ni.