Mexican drug lord Joaquín ‘El Chapo’ Guzmán-a nupui chu ruihhlo tawlhruk chungchangah an man tih United States thuneituten an sawi.
Kum 31 mi, Emma Coronel Aispuro hi Washington DC-a Dulles International Airport pawnah man a ni.
Cocaine, methamphetamine, heroin leh marijuana thehdarha puh a nih avanga man a ni.
Guzmán-a hi ruihhlo tawlh ruk leh sum chhehrelh vangin New York-a dam chhung tang tura hrem a ni.
Kum 63 mi, Sinaloa cartel hotupa thin hi US-a ruihhlo tawlh luttu lian bera ngaih a ni.
Kum 2019-a a chungchang ngaihtuah a nih tum khan inpuangin ruihhlo a tih bakah hmeichhe naupang a pawngsual thin thu leh a then chu kum 13 chauhte an nih thu a sawi a. An cartel member hlui leh an elpui tam tak a that bawk tih a sawi.
US justice department chuan Coronel Aispuro-i hi DC-a sorkar laipui court-a video conference hmanga a inlan tur thu an sawi.
Ruihhlo tawlh ruk thubuai bakah hian kum 2015-a Mexico lung in atanga a pasal tlan chhuahna tur kawng dappuitua puh a ni bawk.
Mexico-a tan in ven nasat ber, Altiplano atang hian Guzmán-a-a hi a fapaten a bul hnaia in an lei hmang tangkaiin, lei verh atangin motorcycle tê chiin a tlan chhuak.
Court lehkhaah chuan Coronel Aispuro-i hi January, 2017-a Mexico atanga US-a a pasal an thawn hmaa a tlan chhuahna tur ruahmannaah a inhnamhnawih nia tar lan a ni.
An puhna hrang hrangah hian engmah a sawi ve lo.
Coronel Aispuro-i hi US leh Mexico khua leh tui nei niin Guzman nen hian fa phir an nei a. New York-a thla thum lai a pasal thubuai an ngaihtuah chhung khan ni tin deuhthaw a inlan a. A pasalin mi a thah leh a pawngsual a sawi chu a hriat ngai loh thu a sawi a, hmeichhe dang tam tak erawh a kawp thu a sawi.
A pasal lakah a rinawm a, “A inlantir duh dan ang hi ka hriat dan a ni ve lo va, mihring a nihnaah ka duh a, ka tawna pasal atana ka neih a ni,” a ti.
Guzmán-a hi Mexico-a Sinaloa-a rethei taka piang a ni a. Ruihhlova a sumdawnna a hlawk hnuah erawh khawvela hausa ber pawl niin Forbes-in kum 2009-a khawvel mi hausa a thlanaah No. 701-na hauhvin $ tluklehdingawn khat a nei.