Taliban thuneitute chuan thla chanve vel liam ta chhungin Afghanistan-a thlasik khaw vawt lutuk avangin mi 124 vel an thi tih an sawi.
State Ministry for Disaster Management thupuangtu chuan kum 10 chhunga thlasik a vawh ber tumah hian ran vulh 70,000 vel an thi bawk tih a sawi.
Tanpuitu pawl hrang hrang chuan tun hnai hun eng emaw chen atang khan Taliban sorkarin Afghan hmeichhiate tlawmngai pawla an thawh an phalsak loh avangin hna an thawk duh rih lo.
Taliban minister hian thihna thleng nual tawh mah se thu an lo tihtluk tawh chu an tidanglam dawn rih dawn chuang lo tih a sawi.
Disaster management minister nihna chelh lailawktu, Mullah Mohammad Abbas Akhund chuan Afghanistan hmun tam tak chu vurin a khuh avangin tlawhpawh theih a ni rih lo tih BBC a hrilh a. Chhanchhuah hna thawk turin sipai helicopter tirh an nih thu a sawi a, hetih rual hian tlangramah chuan a tum hleithei hlawm lo niin a sawi.
Minister chuan ni 10 lo awm leh tur chhung hian khua a lum hret tawh tur thu a sawi a; mahse, mihring leh ran thu erawh an la pun reng theih thu a sawi.
“Mihring leh ran thi tam zawk hi thingtlanga mite deuh vek an ni a, damdawi in leh damdawi tha an nei thei lo a ni,” tiin Mullah Akhund chuan a sawi.
“Tunah chuan tlangrama la cheng mekte kan ngaihtuah ber rih a, vur avangin tlangram panna kawngte a ping vek rih a. Kawngah lirthei an tang a, khaw vawtin a chuangte a hmet hlum mek a ni,” a ti.
Afghanistan-ah hian thlasik hi a na thin hrim hrim a, kumin erawh kum eng emaw zat hnuah a nat ber tum a ni.
Kuminah hian thla hmasaa Taliban sorkarin tanpuitu pawla Afghan hmeichhiate thawh ve a phal loh avanga pawlte an chet duh lohna chuan a ti zual.
Mullah Akhund erawh chuan an thutlukna siam tawh hi thlak an tum lo va, an tih ngei ngai a nih thu a sawi a. Ram dangte chuan Afghanistan-a Islamic nun dan leh khawsak phung (culture) chu an pawmpui a ngai zawk niin a sawi.
“Mipaten chhanchhuah hna an thawk reng a, hmeichhia nena thawhho kher a ngai lo. Chhung tina mipate chu chhanchhuah hna thawhah hian an tel a, hmeichhe mamawhna a awm lo,” tiin BBC hnenah a sawi.
Hetih lai hian United Nations pawh telin, tanpuitu pawl hrang hrangte chuan sorkarin khapna a kalpui karah hnathawh thuai thuai dan tur an dap mek.