North Korean thuneitute chuan thlasik khaw vawt na takin Korean peninsula a hmeh mek laiin an ram mipui hnenah khaw vawt uchuak tak a lo thleng dawn tih an sawi lawk.
An ram hmar lam hmun thenkhat chu -30°C thlengin a vawt dawn tih an sawi lawk a, heng lai hmun hi an ramah pawh a rethei lai ber a ni tih sorkar radio chuan a puang.
Tuipui kamah thli na tak a thawk dawn niin sorkar chanchinbu hian a tar lang bawk.
South Korea pawh khaw vawt tak thleng tur hi an puang tawh a, China hmar lam pawhin khaw vawh ber tum an tawng mek bawk.
Japan-ah pawh tun kar chhovah hian kum 10 chhunga a vawh ber tum a thleng ngei dawn nia sawi lawk a ni.
Hetih lai hian North Korea bikah hian khaw awm dan uchuak tak tak hian eng anga nain nge mipuiah nghawng a neih thin hriat a harsa bik a, an ram chhung thil thleng hi an puang zar ngai zen zen lo.
Ryanggang, North Hamgyong leh South Hamgyong province-te chu khaw awm dan uchuak tak tak a thlen tamna thin hmun an ni a, heng hmunte hi hmar lama awm niin an rama province rethei ber berte an ni hlawm.
An khawpui, Pyongyang bakah chuan electric an nei chhe em em a. Heng province pathuma cheng chhungkuate hian thing leh thla rote an tuahin intihlum nan an hmang mai thin niin NK News chuan a tar lang a. An kawngka leh tukverhte pawh vawt lutuk a luh lova lumin a bawh rei thei nan sarangin an ping thin bawk.
December thla khan Radio Free Asia chuan nikuma thlasik na tak chhung khan ‘mi tam tak’ chin hriat lohvin an awm tih an sawi a. An zinga thenkhat chu ei tur tlakchham vang leh khaw vawhin a hmeh hlum te an ni a, an khua hi vur khang theihna khawpa vawt niin ei tur a vâng em em a ni.
North Korea-ah hian kum 1990 chhova tam a tlak hnu atangin ei tur kham an hmu phak ngai meuh tawh lo niin US-a Peterson Institute for International Economics-a research analyst Lucas Rengifo-Keller chuan a sawi.
Kum 2019 khan North Korea hian kum 40 dawn hnua khawkheng an tawrh nat ber tum a ni a. Hemi hma lawk hian UN chuan North Korean maktaduai 10 vel chuan ‘ei tura puihna rang takin an mamawh’ tih a sawi a. Hemi kum hian mi pakhat chu ei tur gram 300 chauh ringin an dam hlawm niin a sawi.
Kum 2020 khan typhoon na tak tak pangain a nuai zui leh a; in, kawngpui, factory leh tui lakna tam tak chhiain mi sang telin an in leh lo an chân.
Scientist-te chuan sik leh sa inthlak nasa avangin khaw awm dan uchuak tak tak, vawt uchuak ang chi pawh tiamin, hetiang hi a thleng tam tawlh tawl dawn niin an sawi.
Thawhlehnia khaw vawt tak lo thleng tur puan a nih lai hi Pyongyang-in karleha Korean People’s Army kum 75-na lawm tura an inbuatsaih mek lai a ni.