US-a California state-ah ni riat lek chhungin inpawngkahna rapthlak tak tak vawi thum a thleng a. San Francisco chhim lamah mipa pakhatin hna a thawhpui thin mi pasarih lai a kap hlum leh a ni.
He thil thlenna hmun hi tuipui kama Half Moon Bay khawpui a ni a, thite hi an vaiin Chinese-American farm worker an ni.
A titua puh, kum 67 mi, Zhao Chunli-a chu police station-a a inpek hnuah man a ni.
He thil thlen hma lawk hian Half Moon Bay atanga chhimchhak lam darkar ruk vel tlan, Monterey Park-ah Lunar New Year lawm hun laiin mi pakhatin mi 11 zet a kap hlum tawh bawk.
Chawlhkar khat awrh liam taah khan Los Angeles chhim lam hret, Goshen khuaah nu leh naute telin mi paruk thah an lo ni tawh bawk.
California Governor Gavin Newsom chuan inkahna thlenna hmasaa hliam tuarte tlawha damdawi ina a awm mek laiin inkahna dang a thleng leh tih a hriat avangin a kal nghal thuai tih Twitter-ah a tar lang a, ‘lungngaihna thuah hnih’ tiin a sawi.
Inpawngkahna hnuhnung ber hi Half Moon Bay huam chhunga farm pahniha thleng a ni.
Thi zinga pali hi pa chinna hmunah an ruang hmuh a ni a, mi dang pathum hi a hnu deuhva an bul lawka truck-a sumdawnna hmunah hmuh an ni a. Hliam tuar pakhat chu damdawi inah lak niin a dinhmun a tha lo hle.
San Mateo County Sheriff Christina Corpus chuan inkahna hi naupangte sikula an kal liam fel hnu lawka thingtlang hmuna thleng a nih thu a sawi.
“Hetianga inkahna hi chu a rapthlak a. Hla taka chhiatna thleng kan lo hriat thin chu San Mateo County-ah kan in chhungah ngei a thleng ve ta,” tiin a office chuan a sawi.
“Naupangte pawhin he thil thleng an hmua an hre ve hi sawi ngaihna pawh awm lo thil a ni,” a ti.
Mi a thah hnuah hian a kaptu bera an puh hian tual chhung police station panin a inpe a, an man lai pawh camera-a lak a ni.
US news channel-te chuan Zhao Chunli-a hi police-in chhuatah nawr betin an man tih an tilang hlawm.
Semi-automatic pistol a keng a, hei hi mi a kahnaa a hman kha nia ngaih a ni a, man a nih hnuah erawh police nena inbiain thil thlen dan an sawitir tih Sheriff Corpus-i chuan a sawi.
San Mateo County Board of Supervisors President Dave Pine chuan he beihna hi ‘hna thawktu luhlul’-in a tih niin Associated Press news agency hnenah a sawi a. “Vawiina Half Moon Bay-a lungngaihna thleng hian min tina hle a ni,” tiin Pine-a chuan thu a chhuah a. “He ramah hian silai a tam lutuk mah mah a, hei hi thlak a ngai a ni,” a ti bawk.
He thil thlen hnu darkar reilo teah Half Moon Bay atanga hmarchhak km 64 vela hla, Oakland-ah inpawngkahna dang thlengin mi pasarih hliamin mi pakhat a thi bawk.
Half Moon Bay-a inpawngkahna thleng hi ni 24 lek chhunga US-a hetiang a thlen vawi 37-na a ni der tawh niin US-a hlawkna nei lo pawl, Gun Violence Archive chuan a sawi.
Anni hian inpawngkahna tia an sawi hi mi pali leh a aia tam thi leh inhliam an awmna inkahna a ni.
Half Moon Bay-a inkahna a thleng tih sawi a awm mek lai hian state chhung chhim lamah chuan detective-ten Monterey Park-a mi pawngkahtu chet chhan an la chhui mek bawk.
He thil thleng hi Asia atanga pem pakhatin a tih niin khawpui daia lamna hmunah mi 11 zet a kap hlum a, amah pawh police-in an man tepah a inkap hlum zui a ni.