Everton chuan an manager Frank Lampard chu kum khat pawh an la inchhawr tlin hma in an ban.
Inrinni zanah khan Lampard-a hnuaiah hian Everton in anni ang thova season harsa tak hmang mek West Ham United chu an tlawh a, 2-0 in an tlawm. Hei hi Premier League game 12 atanga vawi 9 an tlawmna a ni.
Tun dinhmunah Premier League table-ah a mawng ber dawttu an ni a. Match 20 khel tawhin point 15 an hmu a, goal difference tha zawk avangin Southampton chungah an awm mek.
England midfielder hlui kum 44 mi hian nikum January khan Rafael Benitez thlakin Everton hi a enkawl tan a. Club a enkawl lai hian table-ah 16-na an ni a, Premier League atanga tla lo turin a himpui hram.
Club chuan an ban thu an sawi rual hian Lampard-a chungah a hnathawh tawhah lawmthu an sawi.
A hnuaia coaching staff atangin Joe Edwards, Paul Clement, Ashley Cole leh Chris Jones te pawhin Everton an chhuahsan nghal a. Alan Kelly erawh goalkeeping coach a ni chhunzawm dawn.
Tungte thlak ang?
Everton hian manager thar zawn an tan nghal thu an sawi bawk a. Lampard thlaktu atan chian Leeds United manager thin Marcelo Bielsa hming chu a ri ring nghal.
Kum 67 mi Argentina hi Everton neitupa Farhad Moshiri chuan a dahsang hle a. Nikum February a Leeds in an ban hnuah hna dang a la thawk leh lo.
Ani bakah hian Burnley boss hlui Sean Dyche pawh sawi rik a ni a. Southampton manager thin Ralph Hasenhuttl bakah tuna West Bromwich Albion manager Carlos Corberan pawh sawi rik an ni.
Manager thar an neih hma chu Paul Tait leh Leighton Baines ten training an kaihruai ang.