Newcastle United in English Football League Cup semi-final first leg-ah dinhmun thaah indahin hnehna an chang a. Southampton lakah 1-0 in an chak.
St. Mary’s Stadium-ah Nilaini zan khan EFL Cup semi-final hmasa ber hi khelh a ni a. Magpies tan goal khungtu hi Joelinton niin Brazilian midfielder hian minute 73-naah substitute Alexander Isak ball cross duhthusam chu goal-ah a khung.
Hnehna an chan avangin Newcastle United hi kum 1999 a FA Cup final an khelh hnua a vawikhatna atana Wembley Stadium a inelna lian final khel leh turin rinkai an ni mek a. Kum 1969 Inter-Cities Fairs Cup hnua a vawikhatna atan trophy lian chawi leh an tum mek.
A awlsam lo
Newcastle United hma a ding Southampton hi tun tournament-ah hian an tlo viau a. Team lian hneh thei tak an ni.
Magpies nena an inkhelah pawh hian a bet zawk tura ngaih nimahsela an khingpuite an tibuai ngun ve viau.
Newcastle United in final an lut thei a nih chuan an goalkeeper Nick Pope-a’n mawh a phur thui dawn hle a. Second half-ah Southampton substitute Che Adams goal khung ngei ngei tur tum hnih a dansak a. A zawnin match 10 goal a venhimna ni bawkin professional football a khelh hnua goal a venhim zawn rei ber a ni.
Saints hian Adam Armstrong hmangin an si phurh an sut niin a lang hman a, nimahsela VAR hmanga endik a nih hnuah handball avanga pawm loh a ni.
Inkhel tawp dawn lamah defender Duje Caleta-Car chu yellow card a hmuh nawn avangin hnawhchhuah a ni bawk.
Newcastle United boss Eddie Howe chuan, “Team pahnihten goal hlauhawm an nei nual ve ve a, chak thei ve ve an ni. Chuvang chuan keini lam pawhin halftime chauh a ni tih kan hria a, hmabak thui tak kan la nei.”
“Nimahsela kan tan result tha tak a ni a, hmabak erawh a la awm tih kan hriat reng a ngai.” tiin an chak hnuah a sawi.