Real Madrid in extra-time ah goal hnih an khung hmangin hnehna an chang a, Atletico Madrid nen Copa del Rey quarter-final ah inkhelin 3-1 in hnehna an chang.
Ningani zanah Santiago Bernabeu-ah El Derbi Madrileño khelh a ni a. World Cup avanga season chawlh lailawk a nih atanga ni 77 hnuah a vawikhatna atan Real Madrid khelmual in inkhel a thleng.
Real Madrid in bul an tan chhe zawk a, inkhel tan tir atang Atletico Madrid chu team hlauhawm zawk an ni fova, a bikin counter-attack hmanga rang tak taka Real goal an nawr te a hlauhawm thin.
Minute 19-naah Atletico captain Koke chuan Nahuel Molina tan ball fing a pet lut a, Molina hi Real tlarhnung in veng hman lovin Alvaro Morata goal khung tur a siamsak a. Real Madrid chherchhuah striker in Atletico hma a hruai pui.
Real tan kumin a vawikhatna atan ni lo substitute Dani Ceballos chuan inkhel a thlak danglam leh a, dah luh a nih hnuah hlauhawm sawtin Karim Benzema leh Federico Valverde ten chance tha an nei ve ve.
Minute 79-naah Brazilian forward Rodrygo chuan solo goal mawi a khung a. Extra-time khelh ngaiin minute 99-naah Atleti defender Stefan Savic chu hnawhchhuah a ni zui a. Tam zawk an nih hnuah Real in Karim Benzema leh Vinicius Junior te hmangin goal an khung.
Real hian Barcelona, Osasuna leh Athletic Club te hnung zuiin semi-final an lut.
Ningani zan inkhel dangah Mestalla Stadium-ah Athletic Bilbao in 3-1 in Valencia an hneh a. Iker Muniain, Nico Williams leh Mikel Vesga ten Athletico tan goal an khung.