Pakistan-a khawpui lian ber, Karachi-a cheng mi 18 vel chu tun hnai ni 16 liam ta chhungin an chenna hnaiha thil siam chhuahna hmun (factory) atanga bawlhlo (chemical) him lo chhuak vang ni ngeia ngaih theihin an thi.
Sindh province-a health department chuan Ningani khan Keamari district, Ali Muhammad Goth vengah January 10 leh 26 inkar khan mi eng emaw zah an thih thu hi an puang.
“Chhui tawh chinah chuan bawlhlo him lo eng emaw, lunga natna thlen thei vanga thi an ni,” tiin thu a chhuah a. “Chhiatna thlenna hmunah hian khawsikpui enkawlna tur medical camp bun nghal a ni a, chhui zui mek zel a ni bawk,” a ti.
Mi chengte chuan an venga factory pahnih atangin rim danglam tak a chhuak a, chu chuan thaw a tichham ta thin niin an sawi tih health department thuchhuahah chuan tar lan a ni.
Department thupuangtu, Mehar Khursheed-i chuan thite hi an khua a sik a, an hrawk a ro va, a thaw a hah thin bawk tih a sawi.
“Chutianga ni sarih vel an awm hnuah chuan thihna a thleng ta thin a ni,” tiin Al Jazeera hnenah a sawi a. “Natna neiho endiknaah chuan tumahin taksa bawl an nei lo va, an mit erawh a liam thung,” a ti.
Ali Muhammad Goth-a cheng, Hafeez Leghari chuan thi zinga pathum chu puitling an ni a, a dang zawng chu naupang kum khat leh 13 inkar an nih thu a sawi.
“Sorkarin rim lo chhuahna factory-te hi a khar a, thuneitute mite kawm kualin an chhui zui mek zel a ni,” a ti.
Sindh Chief Minister Murad Ali Shah chuan thawktute chu thil thlen dan leh a chhan chhui tura thu a pek thu a sawi.