Nikum chhung khan Mizoramah ngawr natna, Tuberculosis (TB) vangin mi 59 an thi.
National TB Elimination programme report-a a lan danin nikum chhung khan Mizoramah TB vei thar mi 2,084 hmuhchhuah an ni a, chung zinga mi 103-te chu TB pangngai aia tihdam harsa, Multi drug resistant (MDR-TB) vei niin, TB vei thar zinga 333-ten HIV hrik an pai tih hmuhchhuah tel a ni a. TB vei zawng zawng atanga zaa 86 chu enkawl dam an ni.
TB vei hmuhchhuah hi Aizawl district-ah tam berin mi 1,354 an ni a, Lunglei district-in dawtin mi 158 hmuhchhuah an ni a. Kolasib-ah mi 145 leh Serchhip-ah mi 58 hmuhchhuah an ni a. Hmuhchhuah tlemna ber, Mamit district-ah TB vei thar mi 29 hmuhchhuah an ni.
TB veite chaw tha hmanga tanpuina programme, Pradhan Mantri TB Mukt Bharat Abhiyan – Community support to TB patients chu kalpui mek a ni a. He programme hnuaiah hian tanpuitu donor mi 61 an awm mek a, TB damlo mi 120-ten tanpuina hi an dawng mek.
National TB Elimination programme chuan TB vei tam tak chu chhungkaw harsa tak takte an nih thu sawiin an inenkawl chhung a rei a, thla eng emaw zat damdawi chi tam tak an ei a ngaih avangin an hriselnate, eizawnna leh sum leh pai dinhmunten a tuar hle thin niin an sawi.
TB avanga damlote chu chaw tha hmanga tanpui an nih chuan nasa takin an dam theih nan a pui tih sawiin, tunah hian TB vei tanpui ngai mi 1,000 chuang an awm mek thu leh TB vanga damlote tanpuina pe zel turin mi inphalte an sawm.