Aizawl: Bharti Airtel Ltd-a Zonal officer leh engineer ten nimin khan Raj Bhavan-ah Larsap Hari Babu Kambhampati hmuin kumin February atangin Aizawl leh Lungleiah internet chak chi, 5G network hmang tan thei tura an inbuatsaih thu an hrilh.
Airtel hotute chuan 5G network chu February atanga Aizawl leh Lungleia hman tan a nih hnuah April chhungin district headquarter zawng zawngah pawh pek hman an inbeisei thu an sawi a. 5G network hmang tur hian Aizawl hmun lun lai, pawimawh lai leh sumdawnna hmunah tower 53 leh Lungleiah tower 10-te bun hmasak a ni dawn niin an sawi.
Thingtlang lamah pawh internet chak zawka pe chhuak turin fibre an thlun belh chhunzawm dawn niin Airtel hotute chuan an sawi a. An harsatna tawh thin, tower bunna chungchangah mipui inzirtir tul an tih thu sawiin, veng thenkhatah chuan tower bun hlau leh duh lo an awm avangin network a awm lo tan tawh niin an sawi a. Thingtlang lamah erawh chuan VC-te thlawpna tha tak an dawng thin niin an sawi thung.
Larsap chuan Mizoramah Airtel hmalakna a tha thawkhat nia a hriat thu sawiin 5G Network pawh hlawhtling taka kalpui turin duhsakna a hlan a. Internet chak zawk, 5G network chuan education, health leh banking-ah hmasawnna a thlen ngei dawn nia sawiin, heng bakah pawh a tangkaina tur tam tak a la awm thu a sawi.
Aizawl leh Lunglei khawpuite bakah district khawpui leh thingtlang khaw lian deuhah pawh 5G network leh fiber network siam belh zel turin larsap chuan Airtel hotute chu a chah a. Thingtlangah leh hmun kilkhawrah network connectivity a chhiat avangin bank service a tha thei lo tih sawiin, customer-ten harsatna an tawh mek thu leh hei hi telecom service provider-te chuan an ngaihven thuai a tul thu a sawi bawk.