Aizawl : Mizoram Science Society-in ni hnih awh tur pawl 9 zirlaite tana Winter basic Science camp a buatsaih chu nimin khan MLA Prof. F. Lalnunmawia’n Pachhunga University College (PUC) Seminar hall-ah a hawng.
Winter basic Science camp hi Science & Technology department-in sum a pek hmanga buatsaih niin, Aizawla school hrang hrang 10 atangin pawl kaw zirlai 40 an tel.
A ni khatnaah hian zirlaite chu PUC-a Science zirtirtu ten Science subject peng hrang hrang Physics, Chemistry, Biology leh Geology-ah te zirlaite chu zirtirna pein, tlai lamah Science laboratory hrang hrang fanpui an ni bawk.
Winter basic Science camp ni hnihna vawiinah chuan Mizoram Science, Technology and Innovation Council hnuaia Innovation Facility Centre, MINECO-ah leh Mizoram Science Centre, Berawtlang-ah te zirlaite chu hun hmanpui an ni dawn thung.