Magnitude 5.9-a na lirnghingin Iran hmarthlang lama Khoy khawpui a sawi a, mi pathum thiin mi za chuangin hliam an tuar.
Hliam tur hi mi 816 vel an ni a, enkawl turin a bulhnai county hrang hrang an pan hlawm tih West Azerbaijan province Mohammad Sadegh Motamedian chuan a sawi.
Lirnghing nasa ber hi Inrinni khan lei hnuai km 7-a thuk atangin Urmia leh county eng emaw zat a sawi a. A hnuah nghing nawn (aftershock) vawi 40 chuang thleng lehin a na ber chu magnitude 4.2 a tling.
Lirnghing hian in leh thil dang tam tak a tichhia a, a tam ber hi Khoy leh a bulhnai khuaa mite an ni a, hmun thenkhatah power a awm lo bawk.
Khoy hi tun hnai thla eng emaw zat chhungin lirnghing tenauin a lo sawi fo tawh a; mahse, thi leh thil tihchhiat liantham erawh a awm ngai lo.
Thuneitute pawhin chenna in him lo deuhte chu an siam tha a, governor pawhin in chhiate hi in hlui tawh leh rinawm tawh lo deuh vek an ni tih a sawi.
Video thehdarhah chuan Khoy-a kawtthlerte chu Inrinni zan tlai tawh takah khan mahni in chhuahsante avangin a lun hle a. Thenkhat chu khaw vawt tak hnuaiah puan in kaihah an khawsa hlawm.
Iran-a Relief and Rescue Organisation hotupa, Babak Mahmoudi chuan sorkar chanchinbu hnenah Tehran atangin zanlai pelh hnuah puihna tur bungraw phur thlawhna pahnih tirh chhuah a nih tawh thu a sawi a. Khoy chhehvel province atangin truck eng emaw zatin an pan mek bawk tih a sawi.