Aizawl: Aizawl City College Joint Students’ Union (ACCJSU)-in Inrinnia Assembly an neih chu Hachhek bialtu MLA Lalrindika Ralte-in a hmanpui a, thalaite chu ram leh hnam hma lam hun neitu an nih thu leh ram kalsiam siam thatu tur an nih thu a sawi.
Bawngkawn South YMA Hall-ah inkhawm buatsaihah thu sawiin Lalrindika Ralte chuan thalaite chu ram leh hnam hma lam hun neitute an ni a, a siam thatu tur pawh an nih thu a sawi a. Ram dinhmun hre chianga zirlaite chu tute emaw hmanruaa tang mai loa ram tana dinga ke pen turin a chah.
Lalrindika Ralte hian chapona chu hmasawnna daltu a nih thu a sawi a. “Khawvelah hian chapopui tlak khawla dinhmun tha leh ropui a awm lo a. Khawvelah hian mi tin mamawh phuhrukna tur a awm tih a ni a; amaherawhchu, duhamna chhun khahna erawh a awm lo. Duhamna hi kan mualpho puia, kan nunin a chauh phah a, mi tam takin kan chhiatpui mek a ni,” tia sawiin, engtik niah emaw chuan Mizoram hi dinhmun tha zawkah a la din dawn avangin chanvo tha an chan theih nan ram leh hnam tana an theihna sang ber hlan tura inbuatsaih turin a fuih bawk.
ACCJSU Assembly-ah hian Aizawl khawpui chhunga college hrang hrang 10-a Students’ Union hruaitute an kalkhawm a, kum thar 2023 atana hruaitu tur an thlang nghal a ni.