Australian Open a champion ngun ber Djokovic a vawi 10 nan Melbourne Park-ah a champion.
Novak Djokovic-a’n a record siamlai chu belhchhah zelin Australian Open-ah a vawi 10 nan a champion a. Mipa singles inelnaah Grand Slam title 22-na la turin Stefanos Tsitsipas lakah a tawnhriat leh a thiamna a chhawr tangkai.
Rod Laver Arena a Pathianni a final inkhelah Djokovic hian tha taka bul a tan hnuah set hnihnaah erawh a beih ve fe a ngai a. Set thumna nen tang tlang theiin 6-3 7-6 (7-4) 7-6 (7-5) in hnehna a chang.
Kum 35 mi hian Rafael Nadal-a Grand Slam record siamlai chu a tluk chiah a. Vawiin a world rankings thar tarchhuahah number one a ni ang.
Djokovic-a’n a phu e
Kum 24 mi Tsitsipas-a’n a Grand Slam title hmasa ber la turin a nghah a la ngai a. Tun tournament-ah che tha tluang mahse final-ah erawh Djokovic-a lakah hun tha a nei tam lo.
An inkhela a nawrtu zawkah a tan tum pawhin Djokovic-a’n a veng thei zel a. Set hnihna la turin point khat chiah a mamawh hman a, mahse Djokovic-a’n a dang hlawhtling thei.
Djokovic hi Melbourne-ah kum 2018 atangin a la tlawm leh lova, a zawnin match 28 a chak tawh.
Nikum khan Covid 19 vaccine a lak loh avangin Australia a inkhelh phalsak a ni lova. Tun tumah hian malpui hliam tenau nei chungin a inkhel bawk.
“Kan team leh ka chhungte bakin tunhnai kar nga vel chhunga thil chi hrang hrang kan tawn hi an hre lo.”
“Hetiang boruak hrang hrang a awm avang hian tun hi hnehna ka chan tawh zinga a la ropui ber a ni ang.” tiin a chak hnuah a sawi.
A hliam chungchang sawiin, “Kar hnih leh a chanve kalta kha chuan nise tun tournament-ah hian ka mal hliam avangin chak ka inbeisei miah lovang.”
“Ka inkhelh apiang khan tlak loh hram a, round dawt leh luh hram kha ka tum tawp zel a ni.” tiin Djokovic chuan a sawi bawk.
Grand Slam singles title lak tawh :
Australian Open : W (2008, 2011, 2012, 2013, 2015, 2016,
2019, 2020, 2021, 2023)
French Open : W (2016, 2021)
Wimbledon : W (2011, 2014, 2015, 2018, 2019,
2021, 2022)
US Open : W (2011, 2015, 2018)