Manchester City in FA Cup fifth round lut turin Arsenal lakah hnehna pawimawh an chang a. Premier League lama club inum pahnihte inkhelah hian Nathan Ake chuan goal awmchhun khungin 1-0 in an chak.
Etihad Stadium a inkhelah Gunners in league lam thunun mahse Cup-ah erawh City in hnehna an chang a. Minute 64-naah Jack Grealish thawhrah sengin Ake-a’n goal a khung.
Gunners hian goal khungna remchang an nei ve nual thova. First half-ah City goalkeeper Stefan Ortega chuan Takehiro Tomiyasu leh mi thar Leandro Trossard te goal khung tur a dansak tha hle.
February 15 a Emirates Stadium a Premier League a inkhel tur team pahnihte inkarah inthlauhna a sang lo.
City manager Pep Guardiola chuan, “Second half-ah kan tha zawk chiang. Arsenal hian hma an sawn hle a, kan inkhelah pawh kan danglam vak lo. Team tha an ni tih chiang takin a hmuh theih.” tiin an chak hnuah a sawi.
Inrinni zanlaia inkhelah Manchester United in Old Trafford-ah hnehna an chang a. Reading lakah goal thum khungin 3-1 in an chak.
Old Trafford a FA Cup fifth round inkhelah United tan Brazilian midfielder Casemiro chuan minute 54-na leh 58-naah goal a khung a. Minute 66-naah Brazilian dang Fred chuan an goal thumna a khung.
Reading tan veteran Andy Carroll chu hnawhchhuah a ni a, tlem zawk an nih hnuah substitute Amadou Mbengue chuan goal khat a khung ve bawk.