- Ruata
Toyota Kirloskar Motor (TKM) chuan an MPV lar tak Innova chu a chi thar Hycross an tihchhuah hnuah tunah hian an Innova chhuak hlun tak Innova Crysta chu kum 2023 model an phochhuak leh ta a, Innova Hycross ni lo, a chhuak hlun zawk duh tan thu lawmawm tak a ni awm e.
Toyota Innova hi India ramah chuan lirthei hman nasat leh lei hlawh tak mai a ni a. Tunah hian sorkar lirthei atan pawh an hmang nasa em em a. Hei bakah hian khualzin phurh nan leh mimala nei pawh tam tak an awm bawk a. India ramah chuan mi pawimawh phurh nana hman nasat pawl tak a ni awm e.
Toyota Innova thar hi lei theih tura tlangzarh erawh a la ni lo a. Company lam hian a thlalak official-in an phochhuak a, a hma bawr awm dan tur leh lan dan tur an tarlang chiang tawh a ni. Toyota chuan Innova Crysta thar hi booking an hawng nghal a, Rs. 50,000 chawiin a book theih tawh a ni.
Design
2023 Toyota Innova Crysta thar tur hian a hma grille design thar hlak a nei a, chrome a chei a ni a. A headlight bawr vel chu a la danglam lo a, fog lamp thar a nei a, chrome a chei a ni bawk a ni. A hma bumper hnuailam hi kan khawih thar bawk a, a hma nena khaikhinin a danglam bawk a ni. 2023 Toyota Innova Crysta hi rawng chi 5 – Silver, White Pearl Crystal, Attitude Black, Superwhite leh Avant Grade Bronz te a awm dawn a ni.
A khawl
2023 Toyota Innova Crysta thar tur hi chi li – G, GX, VX and ZX te a awm dawn a. Heng model hrang hrangte hian khawl inang an hmang dawn a. 2023 Toyota Innova Crysta-ah hian 2.4L diesel khawl a hmang a. Transmission lamah chuan 5-speed manual gearbox, hmangin 148bhp power leh 343Nm torque te a pechhuak thei a ni. Innova Hycross angin petrol khawl a awm dawn lo ve thung a, automatic gearbox a awm lo bawk a ni. ZX variant bik hi 7-seats configuration in a awm a, a dang ho hi 7 leh 8-seater te a awm dawn a ni.
A kentel
Innova Crysta thar tur hian kentel hrang hrang- Smart Playcast 8-inch touchscreen infotainment system with Android Auto and Apple CarPlay connectivity leh TFT MID te a nei a. Hei bakah hian 8-way power adjust driver seat, rear auto AC with digital display, leather seat (Black leh Camel Tan duhthlan tur), smart entry system, seat back table, one touch tumble second row seat leh ambient illumination te a awm a ni.
Himna lamah chuan airbag pasarih, electronic brakeforce distribution, antilock braking system, brake assist, hill start assist control, front & rear parking sensors, 3-point seatbelt & headrest leh vehicle stability control te a awm dawn a ni.
Mahindra chuan Scorpio thar, Scorpio N tichhuak mahse Scorpio chhuak hlun tak kha a ngai ang deuh chiah Scorpio Classic tiin an tichhuak zel tho a. Toyota Innova Hycross chhuak thar hian hetiang chiah hian Toyota Innova Crysta hi a rawn luahlan lemlo a. A thar Hycross awm tho mahse India ramin a lei tam leh miin Innova tih hming an lam a, mitthlaa lang hmasa Innova Crysta chu tichhuak zelin a model thar kum 2023 model an rawn tichhuak dawn ta a ni a. Innova lei tumte tan leh ngainatute tan duhthlan tur pahnih a awm tihna a ni a, hei hi India mipuite tan chuan thil tha tak a ni awm e.
Lei theih tura an tlangzarh fel hun hi la puangzar lo mahse a book theih tawh danah hian a rei lutuk tawh lo turah a ngaih theih a. A duh tur tan leh Innova Crysta lei tumte tan chuan kum 2023 model law law te pawh hi a nghah chi awm e.