Aizawl: Mizoram sorkarin dan lova kuhva tawlh ruk chungchang ngaihtuah tura a din, Task Group on Illegal Arecanut chu nimin khan an thukhawm a, hmun hrang hranga kuhva kudamte kalhsaka dan anga hmalak a nih theihna tura customs department-a report thehluh an rel.
Forensic Science Laboratory Conference Hall-a thutkhawm hi task group chairman, Home Secretary H. Lalengmawia’n a kaihhruai a. February thla chhungin district hrang hranga dan lova lakluh kuhva chhekkhawl awm mek zat khawnkhawm an rel.
Mizorama checkgate-te tun aia chak leh zual leh awmze nei zawka hman a nih theihna turin police-te hma la tura tiin, “A theihna leh tul apiangah CYMA-in YMA branch hrang hrangte kaltlangin police an tanpui ang,” an ti a. “Task group-in hma an lak zui zelna turin hmun hrang hranga dan lova kuhva chhekna kudam awmna LSC/VC pass-te chu kimchang takin DC-ten home department-ah an report ang,” an ti.
Task group chuan dan lova kuhva-a sumdawnnaah tumah inhnamhnawih lo tur leh a inhnamhnawihte pawh rang taka tawpsan tura hriattirin an ngen bawk.