Aizawl: Mizoram Rajya Sabha member K Vanlalvena chuan Bangladesh atanga Mizorama sahimna zawnga ral tlan lo lutten harsatna an tawh loh nan sorkar laipui chu hma la turin a ngen.
Nimin chhun khan Defence Minister Rajnath Singh hoin All Party Leaders MP-ten January 31, 2023 atanga neih tan tur, Parliament Budget Session atana inbuatsaihna atan Parliament Library Committee Room-ah an thutkhawm a. He hunah hian K.Vanlalvena chuan thu sawiin Mizoramah Myanmar atanga raltlan mi eng emaw zat enkawl mek an nih thu leh Bangladesh atanga raltlan lo lut turte erawh ramri-ah BSF-ten an lo dan kir thin avangin mi tam zawkte chu an kir leh thu a sawi.
K Vanlalvena hian Mizo hnahthlak ralthuam kengte leh Bangladesh Army-te chu nimin piah pawh khan khaw pakhatah nilenga an la inkah thu sawiin, civil mite chu anmahni sahim nan Mizorama an lo luh phalsak ngei a tul tih a sawi a. Sorkar laipuiin Bangladesh atanga ral tlante Mizorama lo luh phalna BSF hnenah a pek thuai a tul thu a sawi.