Aizawl : BJP Mizoram State President Vanlalhmuaka chuan, BJP hi Mizoramah an sorkar chuan mipuiin hmasawnna an beisei aia chak leh tha hi a thleng dawn tih a sawi.
Nimina an party pisa-ah thu sawiin Vanlalhmuaka hian, BJP chief minister Narendra Modi kaihhruaina hnuaiah state hnufual tak ni thin Gujarat chu kum 13 chhungin India rama state thangduang berah a hlangkai a. BJP sorkarna state-ah reng reng hmasawnna hi a nih dan tur angin chak takin a kal nghal thin tih sawiin, “Mizoramah pawh BJP-in sorkarna kan siam a nih chuan kum 5 chhungin, Congress leh MNF te kum 30 dawn an thawh aia nasain Mizoramah hmasawnna kan thlen tir dawn a ni,” a ti.
Vanlalhmuaka hian, North East State-a sorkanr chelh mek te hi tun hma chuan Congress party ah te, an state party dangah te awm thin mah se, BJP-ah an inpek hnuah tihdanglamin an awm a, an state-a hmasawnna a thleng chho mawlh mawlh mai a. BJP hi Mizoramah an sorkar chuan hmasawnna mipuiin an beisei aia chak leh tha hi a thleng dawn a. Gujarat state-in hmasawnna an neih ang mirethei daikilkara awm thleng phak hmasawnna hi Mizoramah, BJP kaihhruai sorkar a pian chuan a thleng dawn tih a sawi.
BJP State Office Atal Bhawan, Mipui Run-ah chawlhkar thar inhlanna leh Political Session inkhawm hi BJP Mizoram State General Secretary Lalthangmawii’n a kaihruai a ni.