Myanmar chuan Pathianni khan ram dang atanga an ram tlawha zin veivak tur thlawhna tumtir chu Covid-19 hripui leng chhuanlamin June thla tawp thleng a khap chhunzawm.
Transport & communications ministry pawhin nimina tawp tawh tur ram dang atanga boruak atanga inkalpawhna chu pawhsei a nih thu Xinhua news agency chuan a puang.
Myanmar ramah hian mi 1,43,571-in Covid-19 an kai tawh a, mi 3,216-in an thihpui tawh.
Myanmar sipai hotuten chuan June thla tawp thleng chu hnam sipaite laka an beihpui thlak an titawp rih tawh dawn niin an puang.
Ramchhung himna leh sorkar inrelbawlna dipdaltu an awm a, hmalak ngai a awm a nih hran loh chuan sipai zawng zawng beihpui thlakna chu rampumah tihtawp lailawk a nih tur thu sipai hotuten thuchhuah an siam.
He ruahmanna an neih chhan hi hnam sipai pawl hrang hrangte nena Nationwide Ceasefire Agreement (NCA) thuthlung an siam theihna kawnga puitu a nih an beisei tih an thuchhuah atang hian lang a ni.
February 1-a sipaiten mipui rorelna an hnehchhuh avanga Myanmar rama chengten hun khirh tak an tawn lai mek hian an hmakhua ngaihtuah avangin mipuiten bank atanga pawisa an lakchhuah hnem avangin tunah hian mi thenkhatin pawisa kawl tur an tlachham mek a, thil man a to tulh tulh lawi si.
Kyodo News chuan pawisa hlutna tlahniam mek karah hmanhmawh taka rorelna chelh duh vanga Aung San Suu Kyi-i kaihhruai sorkarna hnehchhuhtu sipaite chu ram chhung economy siam thatna kawnga hmalakna turah an che muang thung hle niin an tar lang.
Sipaiten mipui thlan tlin sorkar thuneihna an hnehchhuh hnua buaina chhuakah mi 800 dawn laiin nunna an chân phah tawh.