Vawiin atanga neih tan tur India Eastern Territorial Congress hmanpui tura Mizoram lo kal Salvation Army hotulu ber General Brian Peddle chuan nimin khan Booth Mansion Conference Hall, Temple Square-ah chanchinbumite a kawm a, an rawngbawlnaah tumah an thliar loh thu leh mahni anpui kawpte (LGBTQ) pawh an ensan loh thu a sawi.
The Zozam Times-in anpui kawp chungchanga The Salvation Army dinna zawhna chhangin General Peddle hian, The Salvation Army-in rawng a bawlna kawngah, mipui rawng a bawlnaahte, mi zawng zawng tana a inhawnna kawngahte inthliarna awm miah loin rawng a bawl thin a. Miin puih a ngai a nih chuan mipa an ni emaw, hmeichhia an ni emaw, naupang leh puitling, hausa leh rethei a thliar lo. Tanpui ngaite tawrhna tana kan rawngbawlnaah hian tumah a thliar lo tih sawiin, “Heng zingah hian mahni anpui kawpte pawh an tel,” a ti.
General Peddle hian khawvela sakhaw hrang hrangte ang thoin The Salvaltion Army hian ngaihdan nghet tak a nei a, nupui pasal inneihna chungchangah chuan Kristianten an pawm dan leh Bible-in a zirtir anga inneih hi an pawm a. Bible chuan inneihna hi mi pahnih inkarah, mipa leh hmeichhia inkarah, hmangaihna nena invuana dam chhung atan ni turin a zirtir a. Helai tê hi LGBTQ community-te nena an ngaihdan a inan lohna tak a nih thu a sawi.
“Kan tum ber chu mi zawng zawng angkhata ena inthliarna awm miah lovin mi tupawh hi Pathian hmangaihna nena tanpuia rawngbawlsak an ngaih hunah an tana hnathawh hi a ni,” a ti bawk.
The Salvation Army atanga chhuak, Salvation Army Church nena inrem leh theih nan hmalak tumna a awm leh awm loh zawhna chhangin General Peddle chuan, Pathian faka inkhawmpui chu an thupui ber a nih thu a sawi.
The Salvation Army-in Mizoram People’s Forum (MPF) an zawm dawn leh dawn loh zawhna chhangin, he pawl hi a hriat mai loh thu leh politics thilah khawvel huap ang chuan The Salvation Army-te an inrawlh lutuk loh thin thu a sawi a, hetihlai hian, ralmuanna a thlen theihna atana an tih theih a awm a nih chuan tha an thawh ve theih a beisei thu a sawi.
General Peddle hian The Salvation Army-ah chuan mipa leh hmeichhia an intluktlang a, hmeichhiate pawh an hruaitu atana an ‘ordain’ thin thu leh hmeichhiate chuan tuna a dinhmun chelh mek, general hna pawh an thawh theih thu a sawi bawk.
Mizorama General Peddle nupa lo zin hian vawiin atanga February 5, 2023 chhunga neih tur inkhawmpui lian, India Eastern Territorial Congress an hmanpui dawn a. Hei bakah hian biak in thar pathum – Phunchawng Corp, Hunthar Corp leh Vaivakawn Corp te a hawng dawn bawk a ni.