Aizawl: Siaha District-a MNF party chhungkaw buaina kal zelah nimin khan MNF Siaha District headquarters-a hruaitu eng emaw zatin party-a an nihna leh primary member an nihna atangin bânna an theh lut leh.
Bânna theh lut zingah hian Siaha District MNWF General Secretary Chhosi Hlychho, J Ronghaka, Dy Receptionist, MNF Dist Hqrs, Siaha; Meisavaih East MNF VC te bakah MNF Unit pakua te pawhin MNF Dist. Hqrs-ah kal chilhin primary member an nihna atangin bânna an theh lut a, bânna an theh luh rual hian an seal kawl laite pawh an pe kir nghal.
Hetih lai hian MNF Siaha Dist-a general secretary leh secretary thenkhatte pawh chu bânna theh lut tura an inbuatsaih laiin an nihna atanga chawlhtir an awm nia thudawn a ni.
Tar lan tawh angin, MNF President Zoramthanga, chief minister ni bawkin Siaha bialtu MLA Dr K Beichhua chu minister atanga bâng tura a tih anga a bân hnuah leh, MNF party atanga chawlhtir a ni a, hemi hnuah MNF District Hqrs., Siaha chuan buaina tawk mek zelin mi thahnem takin party-a an nihna leh member an nihna atangin bânna an theh lut tawh a. He buaina hi a intan dawn chauh niin Siaha atanga thudawnna hian a sawi bawk.