Aizawl : ZPM Leader Lalduhoma chuan, Mizoramin sorkar a hrawn tawh te chu party sorkar an ni a. He’ng party sorkar te hi paih thlain ZPM chuan mipui sorkar an din dawn tih a sawi.
Awithangpa Hall, Kawnpuia ZPM Tuirial East & West Joint Block Conference nimina neih chu Lalduhoma hian hman puiin thu a sawi a. ZPM policy kalphung thar an sawi thin awmzia chu mipui sorkar a nih thu sawiin, “Kan sawi chhan pawh kan hrawn tawh sorkarte hi party sorkar a ni a, an sorkar pawhin ram tan ni loin party tan a ni a, thil tha pawh ti dawn se an party-in a thatpui dawn loh chuan an ti duh lo a ni. Keini ZPM te chuan he party sorkar hi paih thlain mipui sorkar kan din dawn a ni,” a ti.
Lalduhoma hian ram tichhetu te chu ruling party an ni zel tih sawiin, “An sorkar chhungin tha taka hnathawk chu awm ve bawk mah se, a tam zawkin hna an thawh that loh avangin kan ramin a tuar ta a ni,” a ti a. ZPM te chu ram tichhetu an nih ve a thian loh avangin, an pawimawh satliah mai a ni lo a, ram leh hnam dinchhuah lehna tur atan pawl ropui tak an nih thu a sawi.
ZPM Tuirial Joint Block conference hi hun hnihah then niin, hun khatna hi R Tlangkhuma, President, ZPM Tuirial West Block in a kaihruai a. He hunah hian ZPM PAC member TBC Lalvenchhunga pawhin thu a sawi bawk.
ZPM Leader hi TBC Lalvenchhunga bakah Lalchungnunga, General Secretary; Baryl Vanneihsangi, AMC Corporator leh hruaitu dang te’n an tawiawm a ni.