Premier League hmahruaitu Arsenal in an midfield-ah duhthlan tur neih belh an ni a. Chelsea tangin Italy midfielder Jorginho chu lalut turin Pound maktaduai 12 in an ti fel.
Kum 31 mi hian Stamford Bridge-ah thla ruk bak contract a nei tawh lova. Gunners hian an lakluh tum Moises Caicedo chu Brighton atang an lakluh theih dawn loh avangin Jorginho lam hi an hawi.
Nipui bazar inkhar ni ah Gunners hi an che a, tukinah chuan a insawnna hi an ti fel tawh ang.
Kum 2018 a Napoli atanga Chelsea zawmtu Jorginho hian Gunners hnenah hian thla 18 daih contract a ziak anga, kum khat ziah belh theihna a awm dawn.
January thlaah player an lakluh pathumna a ni dawn a. Season duhawm an hmang mek a, hlawhtling taka a hmawr an bawk theihna turin an squad an thawm tha a. Poland defender Jakub Kiwior leh Belgium forward Leandro Trossard te an lalut tawh.
Brazil a piang Jorginho hi kum 15 mi a nihin Italy-ah an pem a, ram tan Italy kawr hak a thlang zawk a, vawi 46 inkhel tawhin Euro 2020 champion team-ah a pawimawh hle.
Chelsea tan vawi 213 inkhel hmangin goal 29 a khung tawh a, UEFA Champions League, Europa League, UEFA Super Cup leh FIFA Club World Cup te a lakpui tawh.