India hmar lam hmun tam tak chu vur tla nasa lutuk avangin nunphung pangngai a buai phah mek.
India-in a awp chin Kashmir-ah chuan hmun tam zawk chu vur chhah takin a khuh mek a, power supply a buai phah a; kawngpui, rel leh thlawhna hmanga zinna pawh a tikhawtlai nasa.
Thuneitute chuan district 10 zetah vur tawlh thut a awm thei tih puangin inralrinna dar a khawng.
Hmun lar tak, Srinagar khawpuia Dal Lake-a tui pawh a khang deuh vek a, shikara an tih, houseboat-te pawh vurin a khuh deuh vek bawk.
Khaw awm dan zir lo hian Congress party hruaituten Bharat Jodo Yatra-a tela kawng zawh an tum pawh a tibuai hle a. India Inpumkhatna Kawngzawh hi km 4,000 vel zet zawh niin Thawhtanni khan Kashmir-ah a tawpna hman a ni tawh.
Thawhlehni khan Congress MP Jairam Ramesh chuan MP eng emaw zat chu Srinagar atanga thlawhna thlawk chhuak tur a chet theih loh avangin parliament-a budget session neih mekah an tel theih loh thu Twitter-ah a tar lang.
Himalaya tlangdunga awm, Himachal Pradesh-ah pawh thuneitute chuan kawngpui pawimawhte chu vur tla nasa avangin an khar rih bawk.
An thenawm, Uttarakhand-ah pawh national highway-ah pawh Thawhlehni khan vur tla nasa lutuk avangin darkar eng emaw zat khar a ni.
Weather department chuan Nilaini tuk atang khan vur tla zualpui chu a reh tan dawn niin an sawi lawk thung.