Mizo Zirlai Pawl (MZP) huaihawtin college zirlaiten Mizoram State Subordinate Services Selection Board (MSSSB) chairman bân phutin nimin khan a pisa kai tur an dang a, vawiinah chhunzawm leh an tum.
MZP chuan tun hnaia MSSSB hna lakah hnam dang pathum an tel chu an duh loh thu sawiin, MSSSB hna lak awm zel tur chu ram leilung fate tana him tawk lova an ngaih thu an sawi a. MSSSB chairman chu hnam tana ding tawk lova ngaia January thla chhung ngeia bân tura an ngenna sorkarin a tihhlawhtlin loh avangin nimin khan lungawi lohna an lantir ta a ni.
MSSSB chairman bân phuta a pisa kai tur dan tum zirlai rualte chu nimin zing dar 8:30 vel khan secretariat complex main- building tualah an pungkhawm tan a, zirlai rualte chuan bâng tura an phut thute an aupui a. Chairman chuan chawlh a lak avangin chhun dar 12:40-ah punkhawm tihtawp rih a ni.
MSSSB hnuaia hna lak chungchanga lungawi lohna lantirtu MZP hruaitute chu nimin chawhnu khan Deputy Chief Minister Tawnluia’n a pisa-ah a kawm a, he hunah hian MZP hruaitute chuan MSSSB chairman bâng tura an phut chhan leh zirlaite hmakhawngaia hma an lak dan leh rawtna an neih te an sawi.
Deputy chief minister pawhin sorkar hmalakna hrang hrangte sawiin MZP-ten an hlauhthawn zawng zawngte thleng lo tura hmalak a nih dan turte sawifiahin an lungawi lohna lantir mek chu chawlhsan turin a ngen.
MZP hruaitute hian lungawi lohna lantir chawlhsan tura deputy chief minister-in a ngenna chu zahawm an tih rualin, anmahni ngawta thutlukna siam thei an ni lo tih an hrilh thung.
Nimin tlai khan MZP hruaitute chu thukhawm zui nghalin sorkar hotute nena an indawrnaa an thudawn chungchang an sawiho a. Sorkar hmalakaah lawmna tur an hmuh loh avangin MSSSB chairman pisa kai tur dan chu chhunzawm an rel a, vawiinah an dang chhunzawm leh ang a, hei hian awmzia a neih loh zel chuan naktukah Aizawl khawpui chhungah bân ngiatin kawngzawh huaihawt an tum a ni.