Aizawl: ZPM Leader Lalduhoma chuan Mizorama political party-te kalphung chu siam that a ngaih thu leh hnam lungkhum phum that a ngai niin a sawi.
Aizawl Chanmari YMA Hall-a ZPM Zonu AMC area intuaitharna nimina an a hmanpuinaah Lalduhoma hian thu a sawi a. Mizoramah political party a lo din tirh khan a hmatawngah kohhran hruaitu eng emaw zat telin politics chu mipui rawngbawlna, Pathian rawngbawlnaah an ngai a, politics a thianghlim a. Mahse, hun a lo kal hret a, party inbeihna a na ta em em a, keimahni leh keimahni inbeihnaa a chhuak ta a. A tira kohhran telna tlaka ngaih kha, political party-ah kohhran mi tel tawh loh tur tih chu inkhawmpui lianin a rel tak thu sawiin, “Mizo hnam lungphum phum thar leh kan mamawh a ni,” a ti.
Lalduhoma hian ZPM chuan party sorkar ni lo, mipui sorkar tak tak din an tum tih a sawi a. “Party tana sorkar sum hman a nih fo chuan hmasawnna tur a tithuanawp dawn tih a chiang a, he intihbikna leh thlei bikna hian nasa takin mipui rilru a tichhia a ni,” tia sawiin, party dangte chuan politics hi beisei neiin khelh fuh an tum thin mah se, ZPM erawh chuan khelh dik an tum tih a sawi.
ZPM leader hian hmasawnna tura ruahmanna an siamte chu a daih rei (sustain) tur a nih thu sawiin, “ZPM-in sorkarna a siam chuan hmasawnna hnate hi sustainable project chhungah khungin mipui tana phurrit leh harsatna thleng lo thei ang ber turin kan kalpui ang,” a ti bawk.
Aizawl huam chhunga ZPM Zonu intuartharna hi hun hniha then niin hun khatna hi C Sangzuali, President chuan a kaihruai a; R Vanlalfeli, General Secretary-in thu a sawi a. Hun hnihna hi Lalhmangaihi, Senior Vice President chuan kaihhruaiin, R Lalawmpuii, AMC Corporator leh Alinery L Lianhlawng ten thu an sawi a ni.