Aizawl: Ran vulhtuten an kawtkaia ran hriselna enkawlna, veterinary service changtlung zawk an dawn theihna tura hmalakna, Mibole Veterinary Unit (MVU) 26 chu nimin khan Chief Minister Zoramthanga’n a vai liam.
Selesih-a College of Veterinary Sciences & Animal Husbandry atanga vai liamna puala inkhawmah chief minister chuan thu sawiin ram economy atana pawimawh tak pakhat – sa, bawnghnute leh thil dang hmuhna hnar ranvulhte leh thenkhat tan chuan chhungkaw member ang hiala an en a, ran vulhte hriselna chu ngaih pawimawh tak a nih thu leh mihring hriselna ang bawkin ran vulhte hriselna leh enkawl kawngah hmasawn zel a tul thu a sawi.
MVU-te hi Livestock Health & Disease Control Scheme hnuaia programme pakhat, Establishment & Strengthening of Veterinary Hospitals & Dispensaries (ESVHD) hnuaia hmuh niin pakhat zel Rs 16,00,000 a ni a. A enkawl zuina hi CSS component niin thawktu hlawh, oil man, damdawi man leh tul dangte hi sorkar laipuiin zaa 90 a tum tur a ni a, a bak zaa 10 chu state sorkar tum tur a ni thung.
Hnathawktu tur veterinary daktawr 26 leh paravet 26 lak tawh a ni.
MVU vailiam puala inkhawm hi AH&Vety Secretary Lalzarmawii’n a kaihruai a. AH&Veterinary Minister Er. Lalrinawma pawhin thu a sawi a ni.