Mizoram sorkar hnathawk intelkhawmna, Federation of Mizoram Government Employees & Workers (FMGE&W)-in sorkara an thil phut hrang hrang tihhlawhtlin a nih loh avanga lungawi lohna lantir nan leh sorkar kar nan pendown strike neih an tum a, a hun tur erawh OB-te ngaihtuah turin an dah.
Nimina Taxation Department Conference Hall, MINECO-a FMGE&W General Council meeting chuan dearness allowance (DA) tipung tura sorkar an ngen chungchang te, a hun taka hlawh lak an phut chungchang leh pension kum tisang tura sorkar an ngen chungchang te ngaihtuahhovin an thil phutte tihhlawhtlin thuai a nih theihna tura sorkar kara pen down strike neih chu an rel a ni.
FMGE&W hruaitute chuan Mizoram sorkar hnathawkte DA chu tipung zel turin sorkarah ziakin an thlen tawh thin tih sawiin, sorkar kar nan lungawi lohnate pawh lantir tawh mah se, tun thlengin a hlawhtlinna an la hmu lo tih an sawi.
Sorkar hnathawkten a hun taka hlawh an lak lohna a rei tawh thu pawh sawiin, hemi chungchang hi nikum February 18 pawh khan chief minister hova an sawiho tawh thu leh hemi tum hian a hun taka hlawh pek chhuah thin an nih tur thu chief minister chuan a lo hrilh thu an sawi a. Heti chung hian thla tam tak chhung a hun takah hlawh an la ta chuang lo tih FMGE&W hruaitute chuan The Zozam Times an hrilh.
FMGE&W hruaitute chuan an pawl inkhawmin a lo rel tawh angin Mizoram sorkar hnathawkte pension kum pawh tisanga kum 62 ni tawh tura sorkarah dilna an thlen thu sawiin, chief minister pawhin cabinet meeting-ah ngaihtuah a nih tur thu a lo hrilh tawh thu an sawi a. “Hei pawh hi tun thlengin cabinet meeting-ah ngaihtuah a la ni lo,” an ti a, an thil phut hrang hrangte tihhlawhtlin a nih loh avanga lungawi lohna lantir nan pendown strike neih chu an rel thlu ta tih an sawi bawk.